SHILLONG: Meghalaya a·doko aro mongsongbate Garo Hills-o Jal Jeevan Mission (JJM)-ni kamrangko name ka·ja ine matnanganirang batrorobaengani gimin kamrangko chu·gimik sandirokchina gita a·dokni Opposition Trinamool Congress (TMC) dol dabiangaha.
“Meghalaya a·doko, mongsongbate Garo Hills-o JJM-ni kamrangko chu·sokatanio MDA sorkarini gisiko nanggijani aro kamrangko name ka·gijaniara cha·bokaniko mesokanisa ong·a. JJM-ni kamrang a·doko chu·sokgipa ong·e ine a·dokni PHE Minister Marcuise Marak a·kangengoba uni a·jatang East Garo Hills a·jani Dawa Gittinggre aro Nengsep Gittim songrangko man·chape bang·a songrangon manderang chirangko man·tokkujaenga,” ine Robibar salo, TMC-ni dilgipa Richard M Marak matnangataha.
West Garo Hills-ni dam 28 songrango JJM-ni kamrangko sandirokchina gita February-ni 1 tariko Lokayukta-ni ge·etaniko on·anio bang·en tangka paisa jakkalsretaniko aro name chu·sokatgijaniko nikna man·aha ine gisik ra·atpilaniko on·angengon, “Askikandi aro dam 27 songrango JJM water supply-na bang·en tangka paisarangko okahachim indiba ia songrango chi pipe ge·sakoba chate on·jahachim. Iani bidingo a·dok gimikan ma·sitokaha aro ia kamrangni bidingo sandirokna gita nangchongmota,” ine Marak dabiangaha.
PHE Minister pangnan JJM-ni chu·sokgipa percentage aro chi pipe man·gipa nokdangrangni gimin agane rasong dakronga indiba ia songrango chirangkon man·tokkujaenga aro tangka paisarangko jakkalsrettokaha ine matnangatskaengon, “Uni (PHE Minister) dongnuani dongja ine agananiara ong·gramanisan ong·aia maina JJM-ni kamrango bang·en ong·gija dakanirangko mesokaha,” ine TMC-ni dilgipa parakataha.
Ian sorkarini kamo chu·sokgijaniko mesokanisan ong·ja indiba manderangni ka·donganiko cha·bokani gita ong·aha ineba Marak parakataha.
“Manderang tol·e ku·rachakanirangko aro pa·sikanirangko nangja. PHE Minister Marcuise Marak, kamko chu·sokatanide nang·ni jakon ong·a, uni gimin na·a ia kamrangko namdapatgenma ma songni manderang neng·nikanirangko man·engoba pa·sikani kattarangko aganchae dongkugen? Meghalaya a·dokni manderang nambate dangdike on·anikosa nangani gimin sorkari ku·rachakatangko chu·sokatna nanga,” ine TMC-ni dilgipa didiataha.