SHILLONG: Khasi-Jaintia aro Ri Bhoi a·jao songdongenggipa manderangna awareness program-rangko ong·atanichi Khasi ku·sikko Indian Constitution-ni Eighth Schedule-o napatchina dabianiko Khasi Authors’ Society (KAS) bilakbatatna tik ka·angaha.
Sonibar salo, general council tom·aniko ong·atani ja·man kobor ra·timgipa manderang baksa agangrikengon, da·o election-ni result-ko parakani ja·man gital sorkariko rikahaon uamang, Khasi ku·sikko Constitution-ni Eighth Schedule-o napatani bidingo gital ma·mong sorkari baksa agangrikgen ine KAS-ni president DRL Nonglait parakataha.
Meghalaya a·doko Khasi ku·sikkoba English ku·sik baksana official language-rangoni mingsa ong·atani bidingo uamang a·dok sorkari baksa agangriktaina tik ka·angaha ineba Nonglait aganaha.
KAS president-ni parakatani gitade, general council-ni tom·anio uamang songsalni nangchongmotgipa kamrang, jekai pekatgipa sam jakkalaniko champengna ja·ku de·ani, HIV sabisini bidingo manderangna mikrakatani, a·doko tangka paisa jakkalsretanirangko champengani aro uandakgipa dingtang dingtang kamrangni bidingo chanchirimangaha.
Arts & Culture department aro KHADC-ni dakchakanichi KAS-ni chapa ka·enggipa Khasi-English dictionary-ni gimin janapatengon, ia dictionary-ko re·baenggipa bilsini gisepo matchotatna nisan ka·enga ine Nonglait parakataha.
Prof Badaplin War aro Dr Barika Khyriem-ni dilanio sak 11 membor donggipa research dolko songaha ineba KAS-ni president parakataha.
