SHILLONG: Adita salrangna skang, Ri Bhoi a·jani Umtasor-o Amison Muruh minggipa mandeko so·otanio jak dongna nanga ine police-rangni chanchichipe rim·ako man·gipa mande, Shillong-o donggipa Psychiatric hospital-ona ra·angengmiting somoio siaha ine kobor on·aha.
Umtasor songni bilsi 52 ong·gipa Phurly Suting-ko Ri Bhoi a·jani police-rang, May-ni 24 tariko rim·ani ja·man uko salgittamna police-rangni ning·o donchina Ri Bhoi a·jani kachari rai on·atahachim.
Indake ong·genchimoba, May-ni 25 tariko ia mande, gisikni gita tik ong·gijani chinko mesokna a·bachengaha aro uandaken uko Nongpoh Civil Hospital-ona porikka ra·e nina rimangaha. Nongpoh Civil Hospital-o porikka ra·on uko Shillong-ni Meghalaya Institute of Mental Health & Neurological Sciences (MIMHANS)-ona ra·angchina doctor-rang ku·pattiataha aro uandaken ja·mano Shillong-ona ra·angon uko siakosa ra·baaha ine doctor-rang parakatskaaha.
Ri Bhoi a·jani Superintendent of Police (SP) Jagpal Singh Dhanoa-ni u·iatani gitade, Suting-ko rim·e police-rangni ning·o donatani ja·man ua gisikni gita tik ong·gijani chinrangko mesokna aro police-rangni kosako ka·namgija dake mesokahani niamo pangchake uko Nongpoh Civil Hospital-ona porikka ra·na rimangon uko MIMHANS-ona ra·angchina gitasa Nongpoh Civil Hospital-ni doctor-rang aganatahachim. Indiba uko Shillong-ni MIMHANS-ona ra·angon doctor-rang, uko siakosa ra·baaha ine parakatskaaha.
Siani ja·man uni manggisiko Shillong Civil Hospital-ni Morgue-ona ra·angaha aro National Human Rights Commission-ni dongimin niamrango pangchake post mortem ka·aha ineba SP parakataha.
Uni siani a·selko ning·tubate am·sandina a·bachengataha ineba SP parakataha.
