TURA: Dadenggre Block-ni dingtang dingtang songrango donggipa manderangna aro mongsongbate game ge·e cha·enggiparangna Mumbai songjinmani SBI Foundation (SBIF), Garo Hills-ni BAKDIL baksa nangrime dingtang dingtang kamrangko chu·sokate on·aha.
Bakdil-ni DO Rupesh Sangma-ni u·iatani gitade, SBIF-ni tangka paisarangko dakchake on·anichi, Asimgre songo be·gimin check dam-ko taridapenba da·o songo noko game ge·e cha·enggiparangna aro jila kaanirangnaba chirangko on·na man·aha.
Apsan daken, Sategre songoba spring chamber-ko rike on·anichi da·o te 22 nokdangrangna rongtalgipa ringani chirangko on·na man·engaha aro uandaken wachini somoio manderangni neng·nikanirangko chel·chakna man·aha.
Unbaksana Jan Van mission-ni ning·oba SBIF-ni tangka paisarangko dakchake on·anichi Bakdil, Bolchugre songo bolrangko ge·anichi songni sam-bolrangko aro do·o matrangko ripingna dakchake on·aha.
