A·dok gimikni dam 13 counting centre-rango vote-rangko chananggen
SHILLONG/TURA: India a·song gimikon Lok Sabha election-ni vote-rangko da·al Mongolbar salni bako chanengahani gimin Meghalaya a·dokoba damgni Lok Sabha constituency-o pu·ongipa vote-rangko channa gita Election department tarimanaha.
Meghalaya a·dokni Chief Electoral Officer (CEO) BDR Tiwari-ni u·iatani gitade, Meghalaya a·dok gimiko Lok Sabha election-ni vote-rangko channa gita gimik dam 13 counting centre-rangko tarisomanaha aro ia dam 13-oni dam 8-de Shillong Parliamentary constituency aro dam 5-de Tura Parliamentary constituency-ni ning·o ong·enga.
Vote-rangko channani somoio niam retirangko rakkiani bidingo janapatengon, pilak a·jarangon vote chananiko tom·tomao matchotatna gita Deputy Commissioner aro Superintendent of Police (SP)-rang, nangani kri chel·chakanirangko donatmanaha ine CEO parakataha.
Iana skang, a·dok sorkarini dal·dalgipa official-rang, Shillong aro Tura Parliamentary constituency-ni ning·o donggipa counting centre-rango tarisamsoanirangko niangaha.
Ia chang vote-rangko a·jatangtangni counting centre-rangon chanenga aro uandaken Tura-oba vote chananiko Chasingre-o donggipa Inter State Bus Terminus (ISBT)-o dakna gita biaprangko tarisomanaha.
Counting-ko ba vote chananiko da·al Mongolbar pring 8:00 bajioni a·bachengatenga aro uandaken counting official-rangko pring 6:00 bajini gisepon counting centre-rango report ka·china Election Department ge·etaniko on·ataha.
Election Commission-ni donsogimin niamrango pangchake, counting official-rang mobile phone-rangko counting hall-o ra·napna man·jawa indiba nangchongmotgipa official-rangde kamrangko ka·na gita mobile phone-rangko ra·napna man·gen.
Tura-o vote-rangko channa gita gimik sak 132 official-rangko donatmanaha aro chu·gimik result-rangko attam 6:00 bajini gisepo parakatna ka·dongenga ineba Election official-rang parakataha.
Vote-rangko chanani bidingo dingtangmancha tom·aniko ong·atangenba, counting official-rangna talatanirangkoba on·manaha ineba West Garo Hills a·jani District Election Officer parakataha.
Vote-rangko changipa biaprango nanga gita chel·chakgipa sipai dolrangkoba donataha aro pring 7:30 ja·mande ISBT-ona garirangko ra·napna man·jawaha ineba DEO u·iataha.
Shillong Parliamentary constituency-ni ning·o gimik sak 14,00,411 voter-rang aro Tura Lok Sabha constituency-ni ning·o sak 8,26,156 voter-rang dongskaa. Shillong-o service voter-rang gimik sak 2481 aro Tura-o sak 1403 service voter-rang donga.
Tura parliamentary constituency-o sakbri candidate-rang, chong·motan NPP-ni Agatha K Sangma, Congress dolni Saleng A Sangma, Trinamool Congress (TMC)-ni Zenith M Sangma aro Independent candidate Labenn Ch Marak susaahachim aro Shillong parliamentary constituency-o gimik sakdok candidate-rang, chong·motan Congress-ni Vincent H Pala, NPP-ni Ampareen Lyngdoh, VPP-ni Ricky Syngkon, RDA-ni Robertjune Kharjahrin, baksana Independent candidate sakgni, chong·motan Prof Lakhon Kma aro Peter Shallam susaangahachim.
Shillong parliamentary seat-o da·o dipet VPP dolni dilgiparang, lak 1-na batgipa vote-rangchi chena ka·dongengon, Tura Lok Sabha seat-o ia changde NPP-ni candidate Agatha K Sangma-ko Congress dolni candidate Saleng A Sangma chegen ine bang·a manderangan ka·dongsotokskaengachim.