SHILLONG: Ia chang Shillong Parliamentary seat-ko cheahani gimin ma·mongo gipin dolrang baksa bakrimani bidingo Voice of the People’s Party (VPP)-ni dilgiparang bakan tom·e chanchirimanggen ine Mongolbar salo, Shillong-ni gital MP Ricky AJ Syngkon parakataha.
Khasi aro Jaintia Hills a·jani manderang uko seokahani gimin Khasi aro Jaintia Hills a·jao songdongenggipa manderangni nangnikanirangko chu·sokatanian uni mongsonggipa daito ong·gen ineba Syngkon parakataha.
Shillong Lok Sabha seat-ko cheani ja·man kobor ra·timgipa manderang baksa agangrikengon, Meghalaya a·doko songdongenggipa manderang dingtang dingtang political dolrangni politics kal·aniko be·ekniktokahani giminsa dingtanganiko nangnike ia election-o VPP-ko seokskaaha ine VPP-ni general secretary aro Shillong-ni gital MP parakataha.
“Manderang dingtanganiko nangniktokaha aro da·alni re·sult-an manderangni dingtanganina nangnikaniko mesokani ong·aha. Uni gimin chinga a·doko songdongenggipa manderangni jumangrangko aro nangnikanirangko chu·sokatna nisamsoenga,” ine Syngkon aganaha.
Meghalaya a·dokko dingtangatna aro tangatpilna VPP-ni niksamsoaniko chu·sokatna gitaba ua an·tangko on·kange kam ka·gen ineba Shillong-ni gital MP parakataha.
“Chingo ming 24 miksonganirang donga aro ia kamrang mingprakprakan chingni nikanio namen nangchongmotgiparang ong·a. Ia kamrangko chu·sokgipa ong·atna chinga party-ni gita apsan asonge chanchirimgen aro nangani kri kamrangko ka·gen. Uni gimin badia kamrangko chinga jako ra·chenge ka·anggen, chinga apsan asonge chanchirimani ja·man na·simangna u·iatgen,” ine Syngkon aganaha.