SHILLONG: Gambegre Legislative Assembly constituency-ni MLA Saleng A Sangma, Tura Lok Sabha constituency-ni gital MP-na seokako man·ahani gimin da·o Gambegre Assembly constituency-ni by-election-na tarisamsochina gita ma·mongo Congress-ko dilenggiparang, Meghalaya Pradesh Congress Committee (MPCC)-ni dilgiparangko didiataha.
Re·anggipa Bristibar salo, Tura-ni gital MP Saleng A Sangma, MPCC-ni president aro Shillong-ni gitcham Lok Sabha MP Vincent H Pala, Congress Legislature Party (CLP)-ni dilgipa Ronnie V Lyngdoh aro MPCC-ni working president Deborah C Marak, All India Congress Committee (AICC)-ni president Mallikarjun Kharge-ko grongeani somoio, MPCC-ni dilgiparangna ku·pattianiko on·ataha.
Tura-ni gital MP aro MPCC-ni dilgiparang, apsan salon AICC-ni general secretary Mukul Wasnik-koba grongeaha.
Tura-ni gital MP-na seokako man·aoni sal 15-ni gisepon Saleng, Gambegre MLA ong·aoniko watna nangenga aro ua MLA-ni kamko watani ja·man Gambegre by-election-ko ong·atani bidingo Election Commission u·iataniko on·anggnok.
Meghalaya a·doko Congress dolara mongsonggipa opposition dol ong·engani gimin Gambegre constituency-ko Congress dol chepiltaina nangengachim.
Indake ong·engon, Tura-ni gital MP Saleng A Sangma, MP ong·e ku·mikchetna skang, Bristibar salon Parliament-onaba re·ange pilak nanga kamrangko matchotateaha.
Tura Lok Sabha constituency-o INC-ni candidate Saleng Sangma, 3,83,919 vote-rangko man·e changgittamna Tura-ni MP ong·anggipa Agatha K Sangma-ko 1,55,241 vote-rangchi cheangahachim.