TURA: Meghalaya a·dokni State Reservation Policy-ko gital dake nipiltaianio, dingtang dingtang dolrangni aro a·doko songdongenggipa manderangni nangnikani aro chanchianirangkoba sorkarini songe on·gipa expert committee ra·engani gimin ia 1972 bilsini State Reservation Policy-ko skango gitan donaichina aro taridapjachina gita Tura Garo Seniors Citizen Forum (TGSCF)-ba Expert Committee aro a·dok sorkariko didiataha.
Iani bidingo a·dok sorkarini songe on·gipa Expert Committee-na sedoatengon, “1972 bilsio Meghalaya a·dokko man·chengaonin a·dokna krengdilgipa pagitchamrangni songgigrikgimin gita Garorangna 40%, Khasi-Jaintia-rangna 40% aro a·doko songdongenggipa gipin jatrangna 20%-ko chame State Reservation Policy-ko tariaha aro untalan a·dokni manderang, ia niamkon ja·rikbaenga. A·doko songdongenggipa pilak jatrangnan apsan bak rengsiko tikatna miksonganiosa ia Reservation Policy-ko a·dokni gitcham dilgiparang tariahani gimin chinga ia apsan niamkon ja·rikangkuchina nangnikenga,” ine TGSCF-ni dilgiparang parakataha.
1972 bilsini State Reservation Policy-ko dingtangatna nanggenchimode a·doko songdongenggipa dingtang dingtang jatrangni gisepo meligrikgijanirangko ong·atani cholrang donga ine janapatskaengon, mikkangchi ia State Reservation Policy-ko taridapaniko ba dingtangataniko raken jegalenga ine TGSCF-ni dilgiparang parakataha.
“Uni gimin da·o ong·enggipa Reservation Policy-ko dangtapjachina aro ia apsan niamkon kakket aro bebeo ja·rikangkuchina chinga Expert Committee aro a·dok sorkariko mol·molenga,” ine TGSCF parakataha.
