Kristian MP-ko Modi 3.0 sorkario rimnapanina sing·anirang ong·kata

New Delhi: Kristianrangni kosako Assam-ni Chief Minister aro North East Democratic Alliance (NEDA)-ni convenor Himanta Biswa Sarma-ni mesokgipa kamrangni a·selan salgro salaramni Meghalaya, Mizoram aro Nagaland a·dokrango BJP aro NDA-o bakrimenggipa dingtang dingtang dolrang amako man·aha ine manderang ma·sitokengon da·o Kerala a·doko donggipa BJP-ni saksakamkam Kristian MP George Kurian-ko Union Cabinet-o rimnapahani gimin sing·doanirangba ong·kattokskaaha.
Ia Kristian MP-ko BJP-chi dilenggipa NDA sorkarini Union Cabinet-o rimnapaniara Lok Sabha election-o amako man·ahani gimin BJP aro NDA-o bakrimenggipa dolrangni kosako matnanganirangko kimite galna miksonge rimnapanisa ong·aha ine agananirangko knasona gita man·skaengaha.
Iana skang Kurian, National Commission for Minorities-ni vice chairman ong·e kamko ka·ahachim aro da·o ua BJP Kerala unit-ni vice president-ba ong·engachim.
Kurian-ko Minister-rangni Council-o rimnapaniara salgro salaram a·dokrango BJP-ko ong·gija dake biming man·aniko kimitna aro Kristianrangona sepangbana chol ra·ani gita manderang nikskaenga.
Meghalaya, Nagaland aro Mizoram a·dokrango ‘badiaba’ toromni manderang, NDA-ni kosako pu·onahani a·selsa NDA-ni candidate-rang amako man·aha maina ia damgittam a·dokrango ia toromko ja·rikgiparang bang·bata ine adita salrangna skangsan Assam-ni CM Himanta Biswa Sarma ku·rachakahachim.
Bebera·achi an·sengataniko champengna Assam sorkarini Bill pass ka·anikoba salgro salaram a·dokrango aro gipin biaprangoba Kristian bebera·giparang jegaltokahachim. Ia a·dok damgittamode Assam-ni CM, an·tangni kamrangna aganchakanirangko man·na kenenba election-na campaign-ba ka·jahachim.
2019 bilsioba, West Bengal-ni saksakamkam Kristian MP John Barla-ko Minister-rangni Council-o rimnapahachim indiba 2024 bilsini Lok Sabha election-ode uko Alipurduar constituency-oni susaatjana tik ka·ahani gimin ua jinmani mikkangon BJP-ko ra·biskaahachim.
Ia chang Meghalaya a·doko MDA sorkariko dilenggipa National People’s Party (NPP), Meghalaya a·dokni seat damgnion amako man·aha aro ian ia election-o BJP baksa bakrimahani a·sel ong·aha.
Meghalaya a·doko BJP, NPP baksa bakrimahaoba, re·anggipa 2023 bilsini Assembly election-ode dolgnian doltangarisa susaahachim indiba ia bilsini Lok Sabha election-ode BJP susagija, NPP-na chakpaaniko on·skaahachim aro iani a·selan NPP, a·dokni seat damgnikon gimaatna nangskaaha.