SHILLONG: New Shillong Township-o da·o rikenggipa Meghalaya Legislative Assembly building-ni be·grugimin protchongko da·o August ja bon·achi taripil·taignok.
Koborna parakani gitade, Assembly nokni protchongko July jaoni rikna a·bachenge August bon·achi matchotatna kam ka·enga.
Steel-ni protchongko West Bengal-ni Durgapur-o tariatenga.
IIT-ni agane-mesoke on·a gitan protchongko songdona kamrangko ka·enga.
Ia gitalgipa Assembly building-ko ia bilsion matchotatna gita sorkari miksongenga, maina Krismas-ni somoio ianon salsani special session-ko ong·atna gita sorkari miksongenga.
“Bebegita nisan dogimin gita rika-cho·anirang matchotjaomangba, gitalgipa Assembly building-ko mikkang bilsi Budget session-na matchotattelgen,” ine koboro parakaha.
Da·o dipet, building-ni bijatchigipa aro jakrachipakni dringrangko rong on·enga, jeon 90 percent mangni gita kamrang matchotengaha.
Protchongko building-ni jatchion songdogen.
Gital rikenggipa Assembly building-o, air conditioner donggen, jeon Opposition, rulling aro officer-rangko man·chape neng·takani aro conference hall-rang donggen.
Khyndailad-o donggipa gitcham Meghalaya Legislative Assembly building-ko 2001 bilsio wa·al kame nosto ka·aonin, Assembly building gri ong·a bilsi 23 batangpilaha.
