SHILLONG: Meghalaya a·dokni gital MP sakgnian Opposition-osa asongna nangengani gimin a·dokna maming namgnirangkon ra·bana man·janaba gnang ine aganahani gimin National People’s Party (NPP)-ko Congress dol raken jegalataha.
“Uamang an·tangtangni giminsa aganengakon. Angade Rakkam ong·ja Saleng-sa, uni gimin angade ugita ong·ja. Angni gun aro chanchianirang uoni namen dingtanga maina angade skangoba kam ka·a aro da·oba ka·aigen. Angade uamang gita Opposition-o asongna kengipa ong·ja,” ine Tura-ni gital Lok Sabha MP Saleng A Sangma aganaha.
Meghalaya a·dokni gital MP sakgni, chong·motan Shillong-ni VPP MP Ricky AJ Syngkon aro Tura-ni Congress MP Saleng A Sangma sakgnian, Opposition-osa asongna siengani gimin Meghalaya a·dokna namroro silroroaniko ra·bana man·genma man·jawa aganna man·kujaenga ine adita salrangna skangsan NPP-ni dilgipa aro a·dokni Cabinet Minister Rakkam A Sangma aganahachim.
MP sakgnian namroro silroroaniko ra·bana man·jagenchimode uamangko seokgipa apsan manderangan ja·mano uamangko jegalskanaba gnang ineba ua aganahachim.
Rakkam-ni iandake agananiko jegalatskaengon, “Ian angni skanggipa changna Opposition-o asongenga ong·ja. Angni Independent MLA ong·engmitingoba anga bilsibongana Opposition-o ong·aha. Ua somoiode anga saksansa ong·aiachim indiba da·ode chinga dolni gitasa ong·ahani gimin anga maming neng·nikanirangko nikatjaenga,” ine Saleng aganaha.
Tura-ni gitcham MP Agatha K Sangma, a·dokna Inner Line Permit (ILP)-ko dabiani bidingo changsaba Parliament-o ku·rang on·jaha ineba ua aganaha.
“ILP-ni bidingo Shillong-ni gitcham MP Vincent Pala-sa ku·rang on·aha, Agatha-de ong·ja,” ine Tura-ni Congress MP aganaha.
Tura Lok Sabha seat-ko cheani bidingo janapatskaengon, “Chingo maming programrang dongjachim indiba chinga kakketkosa aganaiaha. Chinga Manipur-o ong·enggipa obosta, chonchongipa jat aro toromrangni neng·nikanirang, a·dok sorkarini kamrang aro gitcham MP-ni kamrangni gimin aganaha,” ine Saleng parakataha.
Uni cheanichi Garo Hills-o NPP-na nangchakeaniko ra·bagenma ine sing·on, “Ia manderangni namnike seokanisa ong·a aro knalo manderang maiko nangnikgen, darangba agansona man·jawa,” ine ua aganaha.
