RONGJENG: Rongjeng-o donggipa skul sambao bonded warehouse-ko dingtang biapona apjitatkujaengani gimin jegalgrime Budbar salo, Rongjeng jolo songdongenggipa manderang, dingtang dingtang NGO-rang, jekai United Christian Peace Forum (UCPF) GSU, FKJGP, ASWA, AHAM, AOSW, APA, GSMC, AAYF, NGCO aro uandakgipa dolrang baksa tom·bimonganiko ong·atangaha.
Ia biapo kuligipa wine store aro bonded warehouse-ara sambao donggipa skuloni metre 50-ba ong·jawa aro ian kacharini dongimin niamrangko pe·ani gita ong·enga ine jolo songdongenggipa manderang, dingtang dingtang dolrang baksa raken jegalanirangko dakangtokaha.
“Batanggimin bilsirango Rongjeng jolo chu dokkanrangko bang·en kuliaha aro uni kosako ia skul sambaon bonded warehouse-koba kuliaha. Adita salrangna skang chingni East Garo Hills-ni DC-ko grongeani somoion chinga iarangni bidingo una badi ka·ahachim indiba da·alonan maming ja·kurangko de·kujaenga,” ine ASWA-ni president Mukesh Marak parakataha.
GSMC-ni president Sengjan Arengh-ni parakatskaani gitade, re·anggipa May-ni 15 tarikon ia bonded warehouse-ko chipna gita DC an·tangan ge·etaniko on·atahachim indiba salgipinon ia bonded warehouse-ko kulipilaiahachim.
“Ia bonded warehouse-ko chipchina chinga baditaba chang re·ange aganeahachim indiba uamang police case-rangko agane chingkosa ka·mikkenatpilaiaha,” ine Arengh aganaha.
Jinma tom·aniko ong·atangani ja·man poster campaign-koba ong·atangaha aro uni ja·man East Garo Hills a·jani Deputy Commissioner-na BDO-ni jako memorandum-koba on·angtaiaha.