TURA: Meghalaya a·dokni State Reservation Policy-ko gital dake nipiltaichina dingtang dingtang dolrang dabitokahani gimin ia Reservation Policy-ko nipilna gita a·dok sorkari Expert Committee-ko songe on·angahaon, ia State Reservation Policy-ko taridapjachina aro 1972 bilsioni ja·rikbaenga gitan Khasi-Jaintia-rangna 40%, Garorangna 40% aro gipin jatrangna 20% reservation-kon ja·rikangkuchina gita Association for Democracy & Empowerment (ADE), Shillong-ni A·chik Citizens Welfare Organisation (ACWO) aro Williamnagar-ni A·chik Organisation for Social Welfare (AOSW) dolrangba, Expert Committee-na sedoataha.
Iani bidingo ADE dolni gita Reservation Policy-ni Expert Committee-na sedoatengon, “Meghalaya a·dokko man·chengaonin dingtang dingtang jatrang, jong-ada no-abirang gita apsan meli-nangrime songdong-a·chabaenga aro ia jatrangna uamangni gadangni kri India a·songni niam bidikan bilrangko on·aha. Ia bilrangoni mingsade Reservation Policy-an ong·a maina ia policy ba niamkoba dingtang dingtang jatrangni gadangni krisa tarie on·ahani gimin ian Garorang gita ja·manchakgipa jatnade namgni ong·paengachim,” ine ADE-ni president Dalseng Bira Ch Momin parakataha.
Chengonin Meghalaya a·doko songdongenggipa dingtang dingtang jatrang, nokdang ge·sanni manderang gita songdong a·chabatokengani gimin Khasi-Jaintia-rangna 40 percent, Garorangna 40 percent aro gipin jatrangna 20 percent chamanikoba pilakan namnike ra·chakbaengachim ine janapatengon, badiaba dolrangsa ba manderangsa maiba neng·nikanirang dongenba ia Reservation Policy-ko gital dake nipiltaichina nangnikaha ine Momin parakataha.
“Garorangna 40%-ko chamahaoba dingtang dingtang a·selrangchi Garorang da·alonan chu·gimik bak rengsiko man·pakujaenga. Khasi-Jaintiarang baksa tosusagenchimode Garorangni janggi tangani gadang namen ja·manchakbata ine nikna man·gen, uni gimin 1972 bilsini State Reservation Policy-kon ja·rikangkuchina aro ia niamko taridapjachina chinga mol·molenga,” ine ADE-ni president, Expert Committee-na sedoatgipa chittio parakataha.
Iani bidingo ACWO-ni gitaba Expert Committee-na sedoatengon, 1972 bilsionin State Reservation Policy-o Khasi-Jaintia-rangna 40%, Garorangna 40% aro gipin jatrangna 20%-ko chamahaoba da·alonan Khasi aro Jaintiarang baksa tosusagenchimode Garorang pilakni gitan ja·manchakkuenga aro niam gita man·na nanggipa bak rengsirangkon chu·gimik man·kujaenga ine parakatenba, iandake ong·engon je dongsogimin Reservation Policy-ko da·o nipiltaina nanggenchimode Garorangde man·anian dongsrangjawaha ine jegalataha.
“Apsan bak rengsiko man·china gitasa a·dokko man·e on·dilgipa pagitchamrang, Reservation Policy-o Khasi-Jaintia-na 40%, Garorangna 40% aro gipin jatrangna 20%-ko chame on·ahachim indiba da·o a·dokko man·aoni bilsi 50 batpilengahaoba A·chikrang, an·tangtangni bak rengsikon chu·gimik man·kujaenga. Garorangna 40% chamaniara lekkarangosan ong·aia indiba iako kakket aro bebeo ja·rikjani a·sel Garorang da·onan ja·manchakkuenga,” ine ACWO-ni dilgiparang parakataha.
“Uni gimin State Reservation Policy-ko skango gitan donkuchina chinga nangnikenga maina ia Reservation Policy-ko taridapna nanggenchimode A·chikrang kakket bichalko man·gija gita ong·gen,” ineba ACWO parakataha.
Apsan daken Williamnagar-ni AOSW dolba ia Reservation Policy-ko taridapjachina gita Expert Committee-ko didiatengon, a·doko songdongenggipa dingtang dingtang jatrangni gadango pangchakesa Khasi-Jaintiarangna 40%, Garorangna 40% aro gipin jatrangna 20%-ko chamaha indiba ia Reservation Policy-ko da·o gital dake nipiltaina ba taridapna nanggenchimode ian a·doko dingtang dingtang jatrangni tom·tome songdong a·chaaniko golmal ka·ani gita ong·gen ine mikrakataha.
“Reservation Policy-o Garorangna 40%-ko chamahaoba sorkario kam man·aniko niatgenchimode Garorang namen komibatkuenga maina Khasi-Jaintiarangoni sorkario kam ka·giparang sak 35,000-mang gita dongengon Garorangonide sak 19,000-mangni gitasan dongaia. Uni gimin Reservation Policy-o Garorangna 40%-ko chamaniara lekkamangmangosan ong·aia indiba kakketode A·chikrang an·tangtangni bak rengsikon man·tokjaenga,” ine AOSW-ni secretary Premiar N Sangma parakatenba, a·dokni Reservation Policy-ko gital dake nipiltaigija skango tarigimin apsan niamkon ja·rikangkuchina, Expert Committee-ko didiataha.