TURA: Adita salrangna skang, South West Khasi Hills a·jani song damsao, me·chik bi·sa sakbriko sak 12 manderangni kragija dake til·ekdraaniko jegalna aro me·chik bi·sarangna kakket bichalko dabina gita Budbar salo, dingtang dingtang dolrang, jolo songdongenggipa manderang baksa jinma tom·bimonganiko ong·atangaha.
Ia tom·aniko Khasi Hills-ni GSU, All Khasi Hills A·chik Federation (AKHAF), AHAM aro me·chikrangni dol nangrime ong·atangaha aro ia tom·bimonganio dingtang dingtang songrangoni bang·bea manderangba bak ra·angtokaha.
Ia a·sel ong·aniko jegalgrimtokengon, me·chik bi·sa sakbriko drae til·ekanio jak donggipa manderangko da·onan rim·kujaenga ine dingtang dingtang dolni dilgiparang suk ong·gijaniko parakangtokaha.
Dos dakgipa manderangko Bristibar salni gisepo rim·jagenchimode rakbata ja·kurangko de·angna gitaba ia tom·anio jinma tik ka·e donangaha.
“Ia me·chik bi·sa sakbriko tol·e okamatenba ia manderang jinma drae til·ekaha. Dos dakgipa manderangni kosako chinga raken jegalenga aro dos dakgipa manderangko ta·raken rim·china police-rango dabienga. Ia manderangni kosako maming ja·kurangko de·jagenchimode chinga an·tangtangan ja·kurangko de·angskagen,” ine GSU Khasi Hills Zone-ni vice president Tengku Marak parakataha.
Koborko on·ani gitade, ia me·chik bi·sa sakbriara bilsi 13 aro bilsi 14 ong·gipa me·chik bi·sarangsan ong·aiachim aro uamangko uamangni ripeng dakmikgipa manderang sambao donggipa songona okamatani ja·man sak 12 manderang drae til·ekahachim. Ia me·chik bi·sarang Sukrobar salo, ua songona re·angahachim aro Robibar salosa noktangtangona sokbapilahachim.
Ia a·sel ong·ani Sukrobar attamni 7:00 bajimango ong·ahachim.
Ia me·chik bi·sa sakbriko, uamangni ma·drangrang sandiangenba Robibar salosa man·eaha aro iani ja·man me·chik bi·sa sakbrini ma·drangrang, dos dakgipa manderangni kosako FIR ka·doangaha.
SWKH-o me·chik bi·sa sakbriko drae til·ekanina jegale jinma tom·bimonga
Date:
Share post:
