‘Christian Medical Mission in NE India’-ni bidingo Special Lecture-ko ong·ata

TURA: Meghalaya State Education Mission (SEC)-ni salgittamna Garo Hills-ona re·baanio, dingtangmancha ‘Christian Medical Mission in North East India’-ni bidingo Special Lecture-ko Budbar attamo, Tura-ni AB Mission Compound-o donggipa Tura Christian College-o ong·atangaha.
Ia Special Lecture program-ko ong·atanio UPSC-ni gitcham Chairman aro SEC-ni Adviser Prof David Reid Syiemlieh, jinmana aganprakengon, India a·songni salgro salaram jolrango Christian Medical Mission-ni gimin am·sandigiparang namen komia ine an·tangni suk ong·gijaniko parakangenba, iani bidingo research-rangko dakchina aro ki·taprangko sechina Tura-ni skia man·gipa chadamberangko didiangaha.
Salgro salaram a·dokrango Baptist Missionary-rangni, mongsongbate Presbyterian Mission-ni Thomas Jones-ni kamrango pangchake ua bang·en am·sandianirangko dakaha aro Christian Mission aro Mondolirangni bebera·aniko gipatna, lekka porako on·na aro sanna banani kamrangni giminba ua am·sandiaha ineba Prof Syiemlieh aganaha.
India a·songni salgro salaram jolrangona maikai Kristian Missionary-rang sokbae, manderangna sanna bannani aro dingtang dingtang kamrangchi salgro salaram a·dokrangna aro mongsongbate Garo Hills-na on·gilangahachim, uarangni giminba Prof Syiemlieh, ia tom·anio agan-talate on·angaha.
Ia program-ko ong·atanio, SEC-ni Chairperson Prof SM Sungoh-ba jinmana aganprakangengon, ‘Work Culture & Ethics’ katta bichongni gimin agan-talatanirangko on·angenba, chatro chatrirangni gisik aro changa sapanirangko taridapaniara skigiparangni mongsonggipa daitoan ong·a ine gisik ra·atpilaniko on·angaha.
Skie on·ani kamara a·gilsakni seng·anikosan ong·aigija chatro chatrirangna jakni kamrangni giminba skie on·anichi namao dal·atanian ong·a ineba ua aganaha.
India sorkarini ra·gatgipa National Education Policy (NEP) 2020-ni gimin janapangskaengon, ian mikkangchi dingtang dingtang ra·bianirangko warachake a·songna aro songsalna on·gilpana gita chatro chatrirangna on·enggipa kol gita ong·a ine Prof Sungoh aganaha.
Ia program-ko ong·atanio dongpae jinmana aganprakanggipa gipin manderangara, Education Department-ni Secretary Ambrose Ch Marak, Tura Christian College Governing Body-ni President TT Ch Marak, aro gipinrang ong·a.