SHILLONG: National People’s Party (NPP)-chi dilenggipa Meghalaya Democratic Alliance (MDA) sorkarini kamrangko manderang chu·ongnikjahani giminsa Lok Sabha election-o manderang gipin political dolrangna pu·onskaahakon ine a·dokni Deputy Chief Minister aro NPP-ni dilgipa Sniawbhalang Dhar parakataha.
Ia election-o NPP maini a·sel amako man·aha, uko party-ni dilgiparang ma·sina jotton ka·enga ineba ua aganaha.
“Election changantian chinga amgenchimoba, amako man·genchimoba pangnan nipiltaianirangko dakronga. Maio chinga chu·sokgipa ong·jaenga uko namdapatna gitasa chinga kamrangko nipilronga,” ine Dhar aganenba, manderangni namgninan sorkari neng·takpilgija kamrangko ka·enga aro mikkangchiba manderangni namgninan kamrangko ka·angkugen ine parakataha.
Sorkarini chu·sokgijanirangko namdapatna jotton ka·gen ineba ua ku·rachakaniko on·angaha.
“Chinga darangkoba mikkang nitee kam ka·gipa ong·ja aro chingni chu·sokgijanirangna chinga kemako bi·a. Chinga mikkangchi kamrangko namdapatna gita rakbate kamrangko ka·gen,” ine Dhar aganaha.
Election-na skang Voice of the People’s Party (VPP)-ni kamrangko on·na ku·rachakgipani bidingo janapatengon, manderang an·tangtangni pu·onenggipa doloniko maiko ka·dongna man·gen, uko pangnan nipilronga ine NPP-ni dilgipa aganaha.
Ia bilsini Lok Sabha election-ni result-rang, 2028 bilsini Assembly election-na maming nangchakeanirang dongjawa ineba Dhar aganaha.
Dhar-ni aganani gitade, Autonomous District Council aro Lok Sabha election-rangara dingtanggrikrongaia.
Lok Sabha election-o manderangni seokaniko ra·chakangengon, election-o cheani aro amako man·anide politics-ni bakan ong·aia ine NPP-ni national general secretary aganaha.
“Political dolrang an·tangtangni gualanirangoniko skie ra·na nanga aro nambate kamko ka·na nanga,” ine ua aganaha.