TURA: East Garo Hills a·jani Loyola College-o skigiparangni pal college-ni principal an·tangan ‘sanction post-ko ra·jawa’ ine skigiparangni bimingo chitti seenba, skigiparangko soi ka·draataha ine Garo Students Union (GSU) Eastern Zone matnangataha.
GSU-EZ-ni parakatani gitade, Loyola College-o skigiparang baksa agangrikchenggija aro skigiparangna u·iatchenggija college-ni principal Fr Stephen Athiko SJ, an·tangan badiaba skigiparangni bimingo chittiko seenba, skigiparangko ia chittio soi ka·draatahachim.
“An·tangni segipa chittirangko re·anggipa June-ni 6 tariko college-ni principal, skigiparang soi ka·china ine on·ataha. Ia chittiara, skigiparang an·tangtangan sanction post-rangko ra·jawa ine a·kange segipa chittirangsa ong·ani gimin ian niamni a·palo ong·aha,” ine GSU EZ-ni dilgiparang parakataha.
GSU EZ-ni parakatani gitade, Loyola College-ni principal, sanction post-rangko dongnuna miksongesa, college-o skigiparang ia sanction post-rangko ra·na man·jana gita skigiparangni bimingo an·tangan chittiko seaha aro skigiparangko ia chittio soi ka·draatna jotton ka·aha.
“Iandakgipa kamara, Indian Constitution-ni Article 21 ning·o mande sakprakna on·gimin bilko pe·ani gita ong·ahani gimin ia kamko chinga raken jegalenga. Dosko dakgipa college-ni principal, an·tangni dakgualgipa kamrangna kema bi·na nangchongmota aro ia principal-ni kosako college-ni chubata gadango donggipa official-rang, ja·kuko de·na nangchongmota,” ine GSU Eastern Zone-ni dilgiparang parakataha.
Williamnagar-ni Loyola College-ba da·alo People’s College ine mingako man·gipa college ong·ahani gimin college-ni recruitment policy-ko jinmana paraktelna nangaon ga·akachim ine janapatengon, ia college da·alona kingkingan sanction post-rangko parakgija sriksriksa kamko ka·na jotton ka·enga ine GSU-EZ matnangataha.
Mikkangchiba iandake ong·gija kamrangko ka·angkugenchimode GSU-EZ, gipin NGO-rang, skigiparang aro jolo songdongenggipa manderang baksa rakgipa ja·kurangko de·anggen ineba GSU-ni dilgiparang mikrakataha.
