SHILLONG: Sukrobar salo, a·dokni Education Minister Rakkam A Sangma baksa tom·e agangrikanirang chu·sokjahani gimin All Meghalaya SSA Non-Teaching Staff Association (AMSSAANTSA), jingjengatna gita manchiangaha.
Education Minister baksa tom·e chanchirimani ja·man kobor ra·timgipa manderang baksa agangrikengon, sal 15-na somoiko on·ani ja·man a·dokni Education Minister, uamangko agangrikna okamatahachim indiba uamangni dabienggipani bidingo Education Minister, maming ku·rachakaniko on·jaha ine AMSSAANTSA-ni general secretary Barikupar Mylliemngap parakataha.
Mylliemngap-ni aganani gitade, uamang ru·uta bilsirangonin uamangni dormaharangko bariatchina dabienggipani bidingo Education Minister-na gisik ra·atpiltaianiko on·angahachim indiba uamangni dabianiko niatgen ine aganana agrede Education Minister, uamangna maming ku·rachakaniko on·jaha.
Association-ni on·gimin sal 15 bon·ahaon uamang maikai sorkarini kosako jingjengatanirangko dakanggen, iani bidingo AMSSANTSA-ni dilgiparang tom·e chanchianggen ineba Mylliemngap parakataha.
“Chingna Education Minister, maming ku·rachakanirangko on·na man·jahani gimin chinga ia tom·aniko chu·ongnikjaha aro chingni dabianirangko sorkari knachakangkuja ong·ode okumu chake aro dingtang dingtang dake jingjengatanirangko dakna tik ka·aha,” ine AMSSAANTSA-ni general secretary parakataha.
SSA-o kam ka·enggiparangna dormahako bariatchina dabie re·anggipa Mongolbar salosan AMSSANTSA, sal 15 somoiko sorkarina on·angahachim.