SHILLONG: Mitam educational institution-rangni agrepile dam bate fees-ko ra·ani gimin, fees-ko komiatna a·dok sorkari ta·raken chanchirimanggen ine Education-ni Minister Rakkam A Sangma aganaha.
Mni Sukrobar salo kobor ra·timgiparang baksa agangrikmitingo Sangma, indine aganaha, “sorkari, iani bidingo data-ko chimongaha, educational institute-ni fees-ko komiatna ta·raken stakeholder ba daitoko jako ra·e kam ka·giparang baksa agangrikanggen.
Iarangni gisepon educational institute-rangkoba kangal-cholgri nokdangoni re·bagipa chatro-chatrirangna dakchakchina mol·molataha.
Uandake Garo Hills-ona lekka-porani obostarangko nipilan wenani gimin janapatengon, State Education Commission, Captain Williamson Sangma State University-ko nirokeaha ine parakaha.
Uandake state university-na ta·raken Vice Chancellor-ko seokani ja·man faculty-koba ra·anggen. University-ni skanggipa infrastructure-koba tariman·aha.
Minggipin National Education Policy-ko ra·gatani gimin aro ia Policy-ko ra·gatanio maidakgipa neng·nikarang donga iarangni gimin nipilanggen ineba Sangma aganaha.
Indake ong·engon Shillong Engineering College-koba ta·raken kuligen ine aganaha.
