TURA: Meghalaya a·dokko chalaianio National People’s Party (NPP)-chi dilenggipa Meghalaya Democratic Alliance (MDA) sorkari tangka paisarangko jakkalsretenga aro mikka niteesa kamrangko ka·enga ine Robibar salo, Trinamool Congress (TMC) matnangatenba, MDA sorkarini iandakgipa kamrangko baditana manderang chakchikchae dongkuna man·gen ine sing·doataha.
TMC-ni chadambe dolko dilgipa Richard Marak-ni parakatani gitade, a·doko aro salgro salaram jol gimikon namroro silroroaniko ra·bana Tura-o IT Park-ko rikna gita adita salrangna skangsan Development of North Eastern Region (DoNER) Ministry, gong kror 126.94-ko chamatahachim indiba ia Tura IT Park-ko rikna gita a·dok sorkari, Meghalaya Assembly-ni protchong aro PA Sangma Stadium-ni pakmarang be·gruanio jak donggipa apsan company Badri Rai & Company (BRC)-nan kamko on·taiahachim.
“Ia BRC company-an Shillong-o gital rikenggipa Meghalaya Assembly-ni protchong be·gruani aro Tura-o PA Sangma Stadium-ni pakma be·gruanioba jak donggipa company ong·a indiba chingni kobor man·soani gitade, NPP-chi dilenggipa MDA sorkari, Tura-o IT Park-ko rikna gita ia apsan company-nan kamrangko on·taiaha. Adita jarangna skang, Arunachal Pradesh a·doko Chief Minister baksa re·pagipa garioniko bang·bea tangkarangko rim·anioba ia BRC-ni dilgiparangan jak dongachim. Uni gimin ian a·dokko dilenggipa manderang aro tangka paisanamangmang chanchie kam ka·gipa company-ni gisepo nangrimaniko mesokani ong·enga,” ine Marak parakataha.
Ia dal·begipa kamko, kam namjani gimin biming man·gimin company-na on·aniara sorkarini kamo sing·sandina nanganiko mesokaha ineba ua parakataha.
Kamrangko a·doktangni contractor-rangna on·gija gipin biaprangoni dal·dalgipa company-rangnasa a·dok sorkari on·rongenga ineba TMC-ni dilgipa matnangataha.
