SHILLONG: Wachini somoio a·arang be·dapanichi nosto ong·atako man·gipa ramarang, mongsongbate Lumshnong-oni Ratacherra-ona dakanggipa NH-6 ramako pangkamgipa ong·e tarichina a·dokni Chief Minister Conrad K Sangma, sorkari official-rangna ge·etaniko on·angaha.
NH-6 ramani bidingo chanchirimna gita Sonibar salo, a·dokni Chief Minister Conrad K Sangma, National Highways Authority of India (NHAI) aro National Highways & Infrastructure Development Corporation Limited (NHIDCL)-ni official-rang baksa tom·aniko ong·atangenba, ia ramako pangkamgipa ong·e tarina cholrangko sandichina official-rangko ge·etangaha.
Ia tom·anio a·dokni Chief Secretary DP Wahlang, East Jaintia Hills a·jani Deputy Commissioner Abhilash Baranwal aro dingtang dingtang sorkari official-rangba dongpae bak ra·angtokaha.
Ia tom·aniko a·dokni Chief Minister dilangengon, chi jokaniko dingtang biap gita watna aro Mining & Geology department baksana dingtang dingtang department-rang baksa bakrime pangkamgipa cholrangko sandichina sorkari official-rangko ge·etangaha.
2022 bilsio mikkarang jime waanganichi a·arang be·e ia NH-6 ramani km 50 ong·gipa bakrangko nosto ka·angani ja·man, ia rama gita chi jokaniko champengna name am·sandianirangko dakaha aro da·o Home Affairs Ministry-na on·atna gita proposal-ko tariaha ine ia tom·anio Chief Minister aganaha.
Chief Minister-ni aganani gitade, ia proposal-ni bak gita sambao donggipa a·brirangoni chi jokbaaniko dingtang biap gita watna aro ia ramani kosako donggipa a·brirangko mangrakatna gita sorkari kamrangko ka·engaha.
Lumshnong-oni Ratacherra-ona dakanggipa a·brirango bolrangko ge·na gita sorkari kamrangko ka·engaha ineba Chief Minister parakataha.
