TURA: North Garo Hills a·jani Aruakgre songo gital rikenggipa RMSA skul nokko re·baenggipa July jani bon·angachibara matchotgnok ine sorkari ku·rachakaniko on·ataha.
Ia skul nokko rika matchotkujaengani a·sel poraienggipa chatro chatrirang aro skigiparangba neng·nikanirangko chagrongna nangtokenga ine songbadrango parakatani ja·man, ia skul nokko re·baenggipa July jani bon·angachibara matchotgnok ine sorkari official-rang ku·rachakaniko on·ataha.
Aruakgre songara, Gokol song samba jolo donggipa National Highway (NH-51) ramaoni kilometre 5-mang chel·ao donggipa song ong·a aro ia skulo skie on·enggipa mande saksani badi ka·doatani ja·man ia skulona re·ange nion, ia skul nokni obostarangko nikna man·ahachim.
Aruakgre songo donggipa RMSA skulni principal Sengcilda Sangma-ni parakatani gitade, ia skul nokko rika matchotkujaengani gimin uamang sambao donggipa SSA UP skul nokkon jakkaldimna nangao ga·akengachim.
“Ia skul nokko 2018 bilsion rikna a·bachengahachim indiba da·alonan kamrang matchotkujaengani a·sel chinga ia skulo chatro chatrirangko ra·dapna man·kujaenga. Skul nokko rika matchotahaode ian chingna rang·speaniko on·gnok,” ine ua aganaha.
Principal-ni aganani gitade, ia RMSA skulni class IX-o sak 35 chatro chatrirang donga aro uamang SSA UP skul nokni classroom-kon jakkaldimenga. Ia skulo gimik sakdok skigiparang, Class IX aro Class X-ni chatro chatrirangna skie on·enga aro Class X-ni sak 15 chatro chatrirangkode songni chonbegipa community hall-o class-ko ra·skaenga ineba skulni principal parakataha.
Ia chonbegipa skul compound-on sorkari LP skul, SSA skul aro RMSA skulkoba chalaiengachim. LP section-o sak 60-na baten chatro chatrirang donga aro SSA skulo sak 80-na baten chatro chatrirang dongskaa indiba chonbegipa classroom-o indita sak chatro chatrirangko class ra·na nange, ian poraienggipa chatro chatrirangnasan ong·aigija skigiparangnaba neng·nikani ong·enga ine RMSA skulni principal parakataha.
Indake ong·engon, ia skul nokko rikani bidingo sorkari official-rang talataniko on·angenba, ia skul nokko mikkang July jani bon·angachibara matchotgnok ine ku·rachakaniko on·ataha.
Ia RMSA skul nokko rikna gita gong lak 97.04 tangkarangko chamaha ine talataniko on·atengon, kamrang da·o matchotna siengaha aro re·baenggipa July jani bon·angachibarade matchotgnok ine School Education-ni Director seachi parakataha.
Ia skul nokko District School Education Office aro District Rural Development Agency jako ra·e rikaha aro ia skul nokko rika matchotahaode ian poraienggipa chatro chatrirangna aro skigiparangnaba dongtoaniko on·gnok.