TURA: Re·anggipa antionin mikkarang jime waangahani a·sel Garo Hills-ni bang·bata biaprangon chirang dal·bae, chirang banna a·bachengaha aro mitam songrangode nok-jamrang, bagan barirang aro mi a·palrangko chi mripe nosto ka·angaha.
Koborko on·ani gitade, mikkarang jimbee waangani ja·man Mongolbar pringo, East Garo Hills a·jani Williamnagar, West Garo Hills a·jani a·kawe jolrango aro North Garo Hills a·jani badiaba badiaba biaprangoba chi bananirangko nikna man·aha.
West Garo Hills a·jani a·kawe jolrango pangna bilsi gitan Brahmaputra aro Jinjiram chibimarangoni chi ditdobaenba, bang·a songrangon chi banangaha aro mongsongbate Selsella jolo song damgittamko chi banangaha ine official-rang u·iataha.
Chi bananichi nokgri-jamgri ong·na nanggipa nokdangrangna sorkari skul aro community hall-rango relief camp dake ma·chakna on·engaha ineba sorkari official-rang parakataha.
Official-rangni u·iatani gitade, West Garo Hills a·jani a·brirangoba mikkarang jime waangani ja·man a·arang be·anichi nok-jamrang aro bijoli krongrang aditan nosto ka·ako man·angaha.
West Garo Hills a·jani dingtang dingtang block-rango da·o official-rang hisapanirangko dakkuengani gimin baditana kingking nok-jamrang aro manderang nangchakeaniko man·ahachim, tale aganna man·kujaenga ine West Garo Hills a·jani Deputy Commissioner Jagdish Chelani parakataha.
South West Garo Hills a·jaoba mikka baksana balwarang ta·rakbee balangahani a·sel bang·a biaprangon bol be·anirangko aro a·a ruronganirangko nikna man·aha ine kobor on·aha.
North Garo Hills a·jaoba a·kawe jolrango chi banna a·bachenganiko nikna man·aha aro uandaken Resubelpara, Bajengdoba aro uandakgipa dingtang dingtang biaprango chi bananirangchi manderang neng·nikanirangko man·angtokaha. Dekachang-o chi bangipa rama gita pik-up truck gari bolsa, re·angengmiting somoio bikpile a·sel ong·anikoba social media-rango niksona man·aha.
Williamnagar jillaoba Simsang chibima ditdobae samba jolrango chi banna a·bachengaha aro uandaken Mongolbar pringo, Kusimkolgre jolrango chi bananirangko nikna man·aha.
South Garo Hills a·jaoba apsan daken Simsang chibimani dal·baroroenganiko nikna man·aha ine kobor on·timgiparang parakataha.
