TURA: Tura-o skanggipa changna UGC NET porikkako Mongolbar salo ong·atanio namen chu·sokatna gita man·aha.
Tura-o UGC NET porikkako dambri centre-rango, chong·motan Tura Don Bosco College (330501), Sherwood School (330502), Captain William’s School (330503) aro Nokrek Heights School (330504) centre-rango ong·atangaha aro ia centre dambrio UGC NET porikkako Garo Hills gimikoni sak 1080 candidate-rang register ka·enba seangtokaha.
Porikkako skanggipa shift-o Mongolbar pring 9:30 bajioni a·bachengataha aro gnigipa shift-ko attam 2:30 bajioni a·bachengatskaaha.
Porikkako changgni dake seanio maming neng·nikani grian matchotatna man·aha aro pilak centre-rangon maming neng·nikanirangko chagrongna nangani gimin knasona man·jaha.
Ia UGC NET porikkako tom·tome aro name matchotatna man·ahani gimin Tura Don Bosco College-ni Principal aro City Coordinator Fr Bivan Rodriques Mukhim, ia porikkako sokachakgipa pilak centre-rangkon mittelpilangaha.
Porikkako tom·tome matchotatna man·ahani gimin ua District Administration, Police aro HDFC bank-koba mittelpilangaha.