TURA: Batanggimin antirangonin mikkarang jime waengani a·sel Garo Hills-ni bang·bata biaprangon chi bananirangchi manderang neng·nikanirangko chagrongna nangtokengaha aro mikka baksana balwarangba ta·rakengani a·sel, dingtang dingtang dake neng·nikanirangko chagrongna nangtokengaha.
Koborko man·soani gitade, adita salrangna skang Nongalbibra-oni Baghmara-ona dakbagipa ramako chi man·angani ja·man ia rama gita garirang re·na man·kujaenga aro Baghmara jolchipakba ramarang rimilahani a·sel re·ruraanirango neng·nikanirangko chagrongna nangtokenga.
Garo Hills-ni bang·bata biaprangon mikkarang jime waangahani a·sel chiringrang ditdobae kenchakna nanganirang ong·engaha indiba da·o dipet chio gimaani ba sianirangkode kobor man·soa dongkujaenga.
Budbar pringo, Tura-oni Rongram-ona dakbagipa ramao garirang re·na man·gija dongtaina nangaha indiba ja·mano ramako tarienggipa company aro PWD official-rang, ramako tarie on·enba re·na gita man·piltaiaha. Tura-ona dakbagipa NH-51 ramako da·o apalbatate tarianio a·arangko bakahani a·sel mikkarang waahaode a·dubek dakenba ia rama gita re·ruraenggipa gari gorarang neng·nikanirangko chagrongna nangrongengachim.
North Garo Hills a·jaoba Resubelpara aro Mendipathar ramao chi banahani a·sel ia rama gita gari gorarang re·ruraanio neng·nikanirangko chagrongna nangtokenga. Mongolbar salosan ia ramao pik-up truck gari bolsa, chi banenggipa ramako re·angengmiting somoio bikpile a·sel ong·ahachim indiba ja·mano ia gariko saldopilna man·aha aro ia a·sel ong·anio darangba saknaanirangkode man·jaha.
“North Garo Hills a·jao mikkarang jime waanichi da·o dipet Resubelpara Block ning·o gimik te 24 nokrang nosto ka·ako man·aha indiba da·o dipet gipin block-rangonikode iandake nok-jam nosto ong·aniko kobor man·soa dongkujaenga,” ine North Garo Hills a·jani Deputy Commissioner Abhinav Singh parakataha.
Kobor on·ani gitade, East Garo Hills a·jaoba Mangsang-oni Rongjeng-ona dakanggipa ramao dal·bea ro·ong ga·akdapaha indiba una agre nok-jam nosto ong·ani aro rama nosto ong·ani koborrangde dongkuja. Ia ramao dal·begipa ro·ong romtomahani a·sel re·ruraanio adita neng·nikanirangko chagrongna nangenga indiba ia ro·ongko Bristibar salode galna ka·dongenga ine kobor on·timgiparang parakataha.
West Garo Hills a·jao obostarang namjabatenga aro Selsella jolrangko da·o chi mripengahani gimin komibeoba nokdang 39-kode Mongolbar attamon relief camp-rangona apjitataha ine kobor on·aha.
Phulbari, Tikrikilla aro Rajabala jolrangoba da·o mikkarang waangkua ong·ode chirang banna a·bachenggnok ine kenchaksoanirang dongenga.
