TURA: Right To Information (RTI) Act-ni ning·o dorgasto on·aniko East Garo Hills a·jani Williamnagar-o donggipa PHE department ra·chakna jechakaha ine Tura-ni gitcham MLA John Leslee K Sangma, Chief Information Commissioner (CIC)-na badi ka·doataha.
Chief Information Commissioner-na badi ka·e sedoatgipa chittio Sangma-ni parakatani gitade, re·anggipa June-ni 11 tariko ua an·tangni namchikgipani jako RTI-ni dorgastoko Williamnagar-ni PHE department-na on·atahachim indiba unsalo, RTI-ni dorgastoko ra·chakenggipa mande office-ona re·bajahani gimin ua dorgastoko on·na man·gija re·bapilna nangaiahachim.
Uni ja·man June-ni 13 tarikoba ua RTI-ni dorgastoko apsan mandeon, PHE department-ni Public Information Officer (PIO)-na on·attaiahachim indiba office-o ua darangkoba nikjae re·bapilengamitingo, office a·palo mande sakgniko nikaha aro uamang uko maini gimin office-ona re·baaha ine sing·enba ja·mano uko department-ni general branch-ona re·ange dorgastoko on·echina aganaha ine Sangma parakataha.
“Angni namchikgipako general office-ona re·ange dorgastoko on·echina aganani ja·man uamangoni me·asa saksa uko general branch-ona dilangaha aro office-ona re·angon ua uano kam ka·enggipa me·chik saksako nike, dorgastoko on·na jotton ka·ahachim. Office-o kam ka·enggipa me·chik, PIO-na seal ka·e on·atgipa chittiko kulienba poraie niaha indiba department-ni engineer, iandakgipa dorgastorangko skatang ra·chakjachina beng·e donaha ine ua me·chik, dorgastoko ra·chakna jechakaha,” ine Tura-ni gitcham MLA, CIC-na badi ka·e sedoatgipa chittio parakataha.
PHE department-o kam ka·gipa mandeni RTI ka·aniko ra·chakna jechakaniara RTI Act-ni ning·o una on·gimin bilko pe·ani ong·aha ine janapatengon, iani bidingo department-ni officer-ni kosako niamo pangchake ja·kurangko de·china Sangma didiataha.
