NEW DELHI: Robibar salo, Meghalaya a·dokni Cabinet Minister AL Hek, Union Minister George Kurien-ko New Delhi-o grongenba, be·en bitinrangko aro na·tokrangko pale sim·e cha·enggipa manderangna dakchakanirangko on·na man·na gita Animal Husbandry aro Fishery department-rangna tangka paisani gita dakchakanirangko on·china didiangaha.
Union Minister of State-ko grongani ja·man kobor ra·timgiparangna talataniko on·angengon, salgro salaram a·dokrango matburing aro do·orangko jilanirang 6 percent-ni gita ong·ani gimin bewalan namenga indiba Meghalaya a·dokko man·chape salgro salaramni damchet a·dokrango matburing aro do·o jilaniko tang·doatna cholrang dongkuenga ine Hek aganaha.
Indake ong·genchimoba salgro salaram a·dokrango dud on·gipa matburingrang, jekai matchu, do·bok, matma aro uandakgipa matburingrangko jilanirang komiengani gimin ma·mong sorkari dakchakanirangko on·na nangenga ine ua aganaha.
Meghalaya a·doko wak aro matchurangko nangani kri jiltokengani gimin manderangni nangako chu·sokatna man·enga ineba Hek aganaha.
Na·tokrangko jile cha·ani gimin janapatskaengon, Meghalaya a·doko chu·onga gitan pokkrirang, warirang, chidikrang aro chiring chibisikrangba dongani gimin na·tokrangko jile cha·na gita cholrang bang·en donga ine BJP Minister parakataha.
Meghalaya a·doko chiring chibisikrangni dingtang dingtang rokomni na·tokrangko man·a ineba Hek parakataha.
A·dokni chadamberangna janggi tangani cholrangko on·na gita Fisheries, Aquaculture aro Animal Husbandry department-rango cholrang bang·en donga ine janapatskaengon, ian manderangni janggi tangani gadangko dingtangatna aro economy-ko tang·doatani cholrangba ong·a ine Hek aganaha.
Ia department-rangni kamrangko tang·doatna gita ua a·dokona sokbapilahaon ma·mong sorkarina detailed project proposal-ko on·atgen ineba ua aganaha.
