SHILLONG: Batanggimin somoirangoba, Leader of Opposition (LO) ba Opposition dolni dilgipako Assembly-o membor bang·batgipa political dolonikosa Assembly Speaker seokahani gimin da·oba LO-ni kamko uamangan man·na nanga ine Robibar salo a·dokni Opposition Trinamool Congress (TMC) aganaha.
Assembly-o TMC-an MLA-rang bang·batengani gimin LO-ni kamko uamangan man·na nangama ine sing·anina aganchakaniko on·angengon, “Batanggimin somoirangoba Assembly-ni Speaker, ia apsan niamkon ja·rike seokahani gimin da·oba ua apsan niamkon ja·rikna nangaigen,” ine TMC parliamentary party-ni dilgipa Dr Mukul Sangma aganaha.
“LO-ko seokanio Assembly-ni Speaker, darangni ku·pattianiko ba chanchirimchenganiko nangja indiba ian uni daito ong·a maina democracy-ode dikdiksaba opposition dolko dilgipa gri ong·na nangja,” ine Sangma aganaha.
Indake ong·engon, badia party-o badita sak membor-rang donga uko nigija, ja·delbatsranggipa mandekosa nienba LO songna nanga ine TMC-ni sakgipin dilgipa Zenith Sangma aganskaaha.
“Opposition dolni dilgipako seokanide Speaker-ni daitoan ong·ani gimin ua an·tangan nigrike Opposition dolni dilgipako seokna nanga,” ine Zenith aganaha.
“Anga iako gisik ra·attaina nangnikenga, Opposition-o ja·delbatsranggipa MLA ba dilgipakosa Meghalaya Legislative Assembly-o Opposition dolni dilgipa seokrongani gimin ia apsan niamkon ja·rike Opposition dolni dilgipako seokna nanga,” ine ua aganaha.
“Dr Mukul Sangma saksa ja·delbatsranggipa membor-san ong·aija indiba ua changgnina CM ong·gimin ong·a. Ia Assembly-oba uan ja·delbatsranggipa ong·engachim indiba uko Opposition dolni dilgipa seokgija gipinkosa seokskaaha,” ine Zenith aganaha.