TURA: RTI ka·e am·sandion Farmer’s Card-de PM KISAN card ong·ja ine ma·sina man·aha ine Tura-ni MDC aro BJP-ni state vice president Bernard N Marak parakataha.
“Maini gimin game ge·e cha·enggipa manderang PM KISAN scheme-ni namgnirangko man·tokjaenga, RTI ka·e am·sandianio ma·sina man·aha. A·doko game ge·e cha·giparangna PM KISAN card-ko on·gija PM KISAN card ong·gijagipa Farmer’s Card-kosa on·skaaha. Farmer’s Card aro PM KISAN card-de apsan ong·ja. RTI ka·e am·sandion, PM KISAN card-ko man·na gita PM KISAN scheme-ni ning·o register ka·na Farmer’s identity card-rangko nangchongmotachim,” ine Marak parakataha.
Marak-ni parakatani gitade, Farmers Card-ko game ge·e cha·enggipa manderangni man·enggipa pilak agricultural scheme-rang baksa link ka·na nangachim indiba game ge·e cha·giparang bang·batan Farmer’s card-sa register ka·tokahani gimin Prime Minister Narendra Modi-ni ku·rachakgipa namgnirangko man·tokjaengachim.
“Game ge·e cha·enggiparang, an·tangtangna on·gipa farmer’s card-chi maming namgnirangko man·tokjaengani a·sel an·tangtangni kamrango dingtang dingtang neng·nikanirangko chagrongna nangtokenga. PM KISAN-ni ning·o gong 6000/- tangkako changgittam dake game ge·e cha·giparangni account-rango chipatna ku·rachakahachim indiba iani a·selan game ge·e cha·giparang ia namgnirangko man·tokjaenga,” ine Tura-ni BJP MDC parakataha.
Game ge·e cha·enggipa manderangni badi ka·ani gitade KCC loan-ko ra·anioba game ge·e cha·giparang neng·nikanirangko chagrongna nangtokenga ine Marak parakataha.
