TURA: World Day Against Human Trafficking-ko maniani bak gita Sombar salo, dingtangmancha India a·songni simarango aro a·ja ge·antini simarango bi·sa badingsrukaniko champengani bidingo workshop-ko Tura-ni Circuit House-o ong·atangaha.
Ia workshop-ko National Commission for Protection of Child Rights (NCPCR), Meghalaya a·dokni State Commission for Protection of Child Rights (SCPCR) aro West Garo Hills District Administration baksa nangrime ong·atangaha aro ia workshop-ko ong·atanio, SCPCR-ni Member Tiana Arengh, mongsonggipa sokgipa ong·e bak ra·angaha.
Ia workshop-ni technical session-o West Garo Hills a·jani Assistant Commissioner C Awasthi, ‘2:0 Campaign – Presentation on Prevention and Combating Child Trafficking’ katta bichongni gimin agan-talatanirangko on·angaha aro West Garo Hills a·jani Additional Superintendent of Police (ASP) Priyanka Watre, keynote address-ko on·angskaaha.
Ia workshop-ko ong·atanio dongpae jinmana aganprakanggipa gipin manderangara, West Garo Hills a·jani Additional Deputy Commissioner aro NCPCR-ni Nodal Officer Saljong R Marak, District Program Officer CD Arengh aro gipinrang ong·a.
