SHILLONG: Meghalaya a·dokni bang·a biaprangon Jal Jeevan Mission (JJM)-ni kamrang chu·sokgipa ong·jaenga ine matnanganirangko knasona man·engon, JJM-ni bidingo matnanganirangko am·sandina gita ua a·dok gimikonan re·ange nigen ine Sombar salo, a·dokni PHE Minister Marcuise N Marak ku·rachakaniko on·ataha.
A·doko JJM-ni kamrangko matnangtokengani gimin sing·anina aganchakaniko on·angengon, JJM-ni kamrang da·o dipet chu·gimik matchotsranga ong·kuja aro kamrangni gimin matnangtokengoba, PHE department, iandakgipa matnanganirangko niatna jotton ka·enga ine Marak parakataha.
“Uni gimin anga an·tangan iandake matnanganirangko am·sandie nianggen aro da·o election-na dongimin Model Code of Conduct (MCC) matchotahani gimin anga a·dokni pilak biaprangonan wenanggen,” ine PHE Minister parakataha.
Badiaba badiaba kamrango neng·nikanirangde dongkuenga ine talataniko on·angengon, ia pilak neng·nikanirangkon uni department, namatna jotton ka·gen ine Marak, ku·rachakaniko on·angaha.
Meghalaya a·doko JJM-ni kamrang da·o 80 percent-ni gita matchotahachim indiba bang·bata biaprangon kamrangko name ka·na aro manderang chirangko man·tokkujaenga ine matnanganirangko knasona man·kuengachim.