SHILLONG: Meghalaya a·doko dingtang dingtang nokrang, stadium-rang aro rama jal·langrang be·grusimengani gimin kamrangko name ka·jaenga ine NPP-chi dilenggipa MDA sorkariko Voice of the People’s Party (VPP) matnangataha.
Meghalaya a·doko MDA sorkarini kamrangan tangka paisa jakkalsretani bidingo manderangni chanchipanirangko kakket ong·a ine mesokaha ineba VPP matnangataha.
VPP-ni ku·wattimgipa Batskhem Myrboh-ni parakatani gitade, dingtang dingtang nokrangko, rama jal·langrangko aro stadium-rangko rikanirang namjaniara MDA sorkarini miksonganio dal·bea sing·aniko ong·katataha.
Nokrang, stadium-rang aro rama jal·langrangni be·gruanirangara MDA sorkariko tangka jakkalsretgipa ine chanchichipanirangna sakkirangko mesokani gita ong·aha.
“Uamang an·tangtangde iandakgipa matnanganirangna sakkirangko mesokchina aganronga indiba ia kamrangan uamangni kam namgijaniko mesokenggipa sakkirang ong·achim. Indake ong·genchimoba uamang an·tangtangkode naljokate donengani gimin darangba uamangni kosako sakkirangko mesokna man·jaenga,” ine Myrboh aganaha.
“Bilo ong·enggipa manderangni tangka paisa jakkalsretaniko warachakna gita ramram manderangnade namen rakbea kam ong·a indiba manderang salantian uamangni kamrangko nikna man·skaenga. Indake ong·genchimoba uamangni a·sel saknaanirangko chakna nangenggipa manderangba pu·onanichi mesokna gita bilrang dongskaa,” ine VPP-ni ku·wattimgipa aganaha.
MDA-ni dilgiparang iandake manderangni kosako kamrangko ka·angkua ong·ode salsaode uamang balwaon gimaanggnok ineba ua aganaha.