TURA: Meghalaya a·dokni State Reservation Policy (SRP)-ko nipiltaiani bidingo a·doko songdongenggipa manderang aro dingtang dingtang dolrang, expert committee-na an·tangtangni chanchiani aro nangnikanirangko ku·pattie on·tokengon, a·dokni Reservation Policy-ko gital dake nipiltaianio 15 percent-ko general category-na chamchina gita All Meghalaya Minority Students Union (AMMSU)-ba expert committee-ko didiataha.
“State Reservation Policy-ko gital dake nipiltaianio, general community-ni manderangba educational institution-rango aro sorkarini kamna ra·anio cholrangko man·pana gita 15 percent-kode General Category-na, mongsongbate non-tribal-rangna chamchina chinga nangnikenga,” ine AMMSU-ni president Nur Islam, expert committee-na sedoatgipa chittio janapataha.
General category-na chamgipa 15 percent-oni 7.5 percent-kode general category-ni cholgri ong·batsranggipa manderangna chamskachina gitaba AMMSU, expert committee-ko didiataha.
State Reservation Policy-ko nipiltaianio, Khasi-Jaintiarangna 40 percent, Garorangna 40 percent, gipin scheduled tribe aro scheduled caste-rangna 5 percent-ko chamangkuenba, bangki 15 percent-ko general category-na chamskachina gita AMMSU didiataha.