TURA: An·tangtangko BJP-ni dilgiparang ine dakmikgipa manderangsa Garo Hills-o BJP-ni dingtang dingtang dilgiparangko ma·ekatna jotton ka·enga ine Mongolbar salo, Tura-ni MDC aro BJP-ni state vice president Bernard N Marak parakataha.
“Adita salrangna skangsan an·tangtangko ma·siatna sikgijagipa manderang, an·tangtangko Garo Hills-ni BJP dilgiparang ine a·kangenba, Meghalaya-ni in-charge Dr M Chuba Ao aro BJP-ni state president Rikman G Momin-ni kosakoba matnanganirangko dake songbadrango parakataha. Ia kamrangara an·tangtangko BJP-ni dilgipa ine dakmikgiparangni kamrangsa ong·a,” ine Marak parakataha.
Lok Sabha election-o candidate-ko susaatjana gita ma·mong dilgiparangni tik ka·aniko Garo Hills-ni BJP dilgiparangba ra·chakaiahachim ine ua talataniko on·angaha.
“Tura parliamentary seat-oni susaatjani gimin suk ong·gijagipa manderangde party-ko wate re·angaha indiba mitamrangde an·tangtangko BJP-ni mande inen dongkuenga. Ia dakmikgipa BJP-ni dilgiparang, an·tangtangko Garo Hills-ni dilgiparang ine a·kangenga indiba an·tangtangni bimingkode paraktokskajaenga. Uamang Lok Sabha election-ni somoion party-ko wate katangaha. Chingasa Garo Hills-o BJP-ko chong·mot ong·e dilgiparang aro party-o dongkuenggipa membor-rangni gisepode meli-nangrimaniba donga,” ine BJP-ni state vice president parakataha.
Ma·sigijagipa manderangni koborrangko maini gimin da·oba songbadrango sekuenga ine sing·doatengon, koborrangko sena skangba name am·sandichengchina gita Marak, media-ni manderangko didiataha.
“Ia dakmikgipa dilgiparangni miksonganiara BJP-ko ma·ekatna miksonganisa ong·achim aro iani giminan BJP-na kam ka·enggiparang suk ong·gijaniko paraktokaha. Iandakgipa manderangni a·selan ma·mong aro a·dokni dilgiparang, Garo Hills-o BJP-ko dilenggipa manderango ka·donggija ong·atenga,” ine Marak parakataha.
