Mikka waanio nosto ka·a man·gipa Rajabala-Selsella ramako taripilchina FKJGP dabia

TURA: Adita salrangna skang, mikkarang jimbee waanganio chirang bananganichi Rajabala-Balachanda-Selsella ramani mongsonggipa bakrang nosto ka·ako man·angahani a·sel da·o ia ramako re·ruraenggipa aro jolo songdongenggipa manderang neng·nikanirangko chagrongna nangtokengahani gimin ia ramako ta·raken taripile on·china gita FKJGP Rajabala circle, a·dok sorkario dabiangaha.
FKJGP Rajabala circle-ni president Samsen Sangma-ni kobor ra·timgiparangna parakatani gitade, ia jolara Garo Hills gimiko onbatsranggipa biap ong·e pangnan wachini somoirango chirang banani a·sel rama jal·langrang nosto ka·ako man·ronga aro uandaken ia rama gita re·ruragipa manderang neng·nikanirangko chagrongna nangronga. Balachanda-oni Selsella-ona km 15-mangsan dongaia indiba ia ramani obosta namsrangjahani a·sel ia ramako songre songgabatanio konibeoba kontasamang nangenga ine Sangma parakataha.
Ia ramara Dadenggre sub-division-ni ning·o ga·akgipa rama ong·a aro ian Garobadha aro Tura jillarangko nangdimeatgipa ramaba ong·achim.
Indake ong·engon, adita salrangna skang ia jolrango chi banangahani a·sel ia ramani mongsonggipa bakrangko chi nosto ka·angaha aro ian salanti re·rurana nangenggipa manderangna neng·nikani aro kenchakna nanganiba ong·engaha ine FKJGP Rajabala circle-ni president parakataha.
“Ia rama gitan hajalni hajal manderang dingtang dingtang kamrangna re·ruratokenga indiba da·o ia ramako chi pe·angahani a·sel skulrangchi re·enggipa chatro chatrirang, bading chiwale cha·enggipa manderang aro mongsongbate sanna bananirangko ra·na re·ruraenggipa manderang bilongen neng·nikanirangko man·na nangtokengaha. Ia ramao a·kolrara dakani gimin mitam manderang ramako gele salna jotton ka·enba basakobarangde ia ramao a·sel ong·anirangkoba nikna man·enga,” ine Sangma parakataha.
Jolo songdongenggipa manderangni namgninasan ong·aigija ia rama gita re·ruraenggipa pilakni namgninan ia ramako ta·raken taripile on·china gitaba ua a·dokni PWD (Roads) Minister Prestone Tynsong-ko didiataha.