TURA: West Garo Hills a·jani a·kawe jolrango sorkari skulrango skigiparang, apsan skulon private tuition-koba ra·engani gimin All Meghalaya Minorities Students Union (AMMSU), Directorate of School Education & Literacy (DSEL)-o sing·doataha.
Iani bidingo DSEL-na badi ka·e sedoatengon, sorkari skulrango skienggiparang bang·batan apsan skulon private tuition-rangkoba ra·enga ine AMMSU-ni president parakatenba, iandake sorkari ba deficit skulrango private tuition-rangko ra·na man·aiama ine sing·doataha.
“Iandake skulrango private tuition-rangko ra·aniara, je chatro chatrirangko skigiparang tuition ra·e tangka paisarangko man·enga, uamangnasan simsak nirokanirangko on·bataigen aro gipinrangnade inditana simsak nirokanirangko on·na gisik nangjawa,” ine AMMSU-ni president Nur Islam parakataha.
West Garo Hills a·jani a·kawe jolrango da·ororo iandake skigiparangni private tuition-ko ra·anirang batrorobaengaha ine janapatengon, skulrango skigiparang an·tangtangni man·gnina iandake private tuition-rangko ra·na man·aiama ine AMMSU-ni president sing·doataha.
“Sorkari skulrango skigiparangba maming jajrengani grian skultangtango private tuition-rangko ra·e namgnirangko man·enga indide iandake private tuition-ko ra·gipa skigiparangni kosako maming ja·kurangko de·jawama?” ineba ua sing·doataha.
Skigiparangni daitoara chatro chatrirangna a·gilsakni seng·aniko on·anisa ong·a aro iandake man·dapanina rikani ong·ja ineba AMMSU-ni president parakataha.
