SHILLONG: Gambegre Assembly constituency-ni by-election-na Congress dolni candidate-ko seokna gita party-ni dilgiparang, a·dokni gitcham Minister Deborah C Marak aro Tura-ni gital MP Saleng A Sangma gita dakgipa dilgiparangna pakwate on·angaha.
Adita salrangna skang ong·atanggipa Lok Sabha election-o Deborah aro Saleng sakgnini bilakbee campaign-ko ka·anichi Tura Lok Sabha constituency-o Congress dol chegipa ong·na man·ahachim.
Congress doloni koborko on·ani gitade, Gambegre Assembly constituency-ni by-election-o susana Congress dolni candidate-ko seokna gitaba Congress dolni dilgiparang, uamang sakgnini jakon pakwate on·angaha.
Lok Sabha election-o Congress dolni candidate Saleng A Sangma, NPP-ni candidate aro Tura-ni gitcham MP Agatha K Sangma-ko lak 1.55-na batgipa vote-rangchi chee gital MP-na seokako man·ahachim aro Saleng-ni MLA ong·aoniko watangani ja·man da·o Gambegre Assembly constituency-na gital MLA-ko seoktaina nangengahachim.
Gambegre by-election-o susana gita da·o dipet Congress dolni candidate-ko name tik ka·kuja ine talataniko on·angengon, Gambegre constituency-ni manderang sako namnikbatgen uko Saleng an·tangan ma·siani gimin Congress dolni candidate-ko Gambegre constituency-onikon seokani cholrang donga ine Congress doloni kobor on·timgiparang parakataha.
Gambegre by-election-o Deborah Marak-ba susaani cholrang dongama ine sing·anina aganchakaniko on·angengon, Deborah an·tangde Gambegre by-election-o susana skaniko mesokjaha ine kobor on·timgiparang parakataha.
Indake ong·engon, baditaba bilsirangni ja·man Tura Lok Sabha seat-ko Congress dolni candidate Saleng Sangma cheahani gimin re·baenggipa July-ni 6 tariko Saleng-na dingtangmancha party-ni gita mande ra·pilskaaniko dakna sienga ine kobor on·aha.
Congress dolni gitcham dilgiparangba party-ona re·bapilna miksongenga ine jangbingbanganiko jegalatskaengon, da·o dipet iani bidingo uamang gitcham dilgiparangni u·iataniko man·soa dongkuja ine Congress dolni dilgiparang parakataha.