SHILLONG: Gambegre Assembly constituency-ni gitcham MLA Saleng A Sangma, Tura-ni MP-na seokako man·e MLA-ni kamko watangani ja·man da·o jadokni gisepon Gambegre Assembly constituency-ni by-election-ko ong·atna nangengon, komibeoba sak 10 manderang, National People’s Party (NPP)-ni candidate ong·e susana gita tikitna nidingenga ine kobor on·aha.
NPP-ko dilgiparangni u·iatani gitade, Gambegre by-election-o susana gita komibeoba sak 10 manderang, NPP-ni tikitna susana miksongenga indiba NPP-ni bang·bata membor-rangan, a·dokni Chief Minister aro NPP-ni national president Conrad K Sangma-ni jikgipa Mehtab Chandee A Sangma-na party tikit on·aniko nangnikbattokenga.
“Da·o dipet NPP-ni candidate-ko tik ka·a dongkuja indiba NPP-ni bang·bata membor-rangan, Chief Minister Conrad Sangma-ni jikgipa Mehtab Chandee-na tikit on·aniko nangniktokenga,” ine NPP-oni kobor on·timgiparang aganaha.
Kobor on·timgiparangni u·iatani gitade, Gambegre Assembly constituency-ni by-election-o NPP-ni candidate ong·e susana nangnikenggipa gipin manderangara, a·dokni gitcham minister aro Chief Minister Conrad Sangma-ni adatang James PK Sangma, uni nogipa aro Tura-ni gitcham MP Agatha K Sangma, MDC Rakesh Sangma, 2023 bilsini Assembly election-o NPP-ni candidate ong·e susagipa Ambrose Marak, Nehru Sangma aro gipinrang ong·a.
“NPP-ni candidate-ko seokani bidingo bakan NPP-ni dilgiparang tom·e chanchirimanggen,” ine kobor on·timgiparang parakataha.
Adita salrangna skang ong·atanggipa Lok Sabha election-o Congress dolni candidate Saleng A Sangma, NPP-ni candidate aro Tura-ni gitcham MP Agatha K Sangma-ko lak 1.55-na batgipa vote-rangchi chee gital MP-na seokako man·ahachim aro Saleng-ni MLA ong·aoniko watangani ja·man da·o Gambegre Assembly constituency-na gital MLA-ko seoktaina nangengahachim.
