Garo Hills-o Int’l Day Against Drug Abuse & Illicit Trafficking-ko manianga

TURA: A·gilsakni gipin biaprango gitan Garo Hills-ni dingtang dingtang biaprangoba International Day Against Drug Abuse & Illicit Trafficking-ko Budbar salo maniangtokaha.
West Garo Hills a·jao ia International Day Against Drug Abuse & Illicit Trafficking-ko District Legal Services Authority (DLSA), National Legal Services Authority-ni ning·o Meghalaya State Legal Services Authority baksa nangrime Tebronggen songo manidilangaha.
Ia salko maniani bak gita program-ko ong·atanio, DLSA-ni Legal Aid Counsel John Cronin Ch Sangma, DLSA-ni kamrangni bidingo agan-talate on·angenba, maikai songsalni manderangna, mongsongbate kangal cholgrirangna indin ainni gita dakchakanirangko on·enga, uarangni bidingo agan-talatanirangko on·angaha.
Ia program-ko ong·atanio, Tura Sadar Police Station-ni Police officer Bitching N Marak-ba jinmana aganprakengon, West Garo Hills a·jao pekatgipa samrangko jakkalani aro badingsrukanirangko champengna gita kamrangko ka·engani gimin janapangaha. Sam jakkalgiparangna Tura Civil Hospital-o sanna banani cholrang aro agan-ku·pattie on·anirangko man·enga ine janapatengon, saoba iandake pekatgipa samrangko jakkalenga ine nikgenchimode uni bidingo u·iatenba, uko sanna banna gita aro agan-ku·pattie on·na gita rimbana nanga ine Marak aganaha.
North Garo Hills a·jaoba jagimikan ia salko manisamsoani bak gita District Mental Health Society, Social Welfare Office aro North Garo Hills District Legal Services Authority (DLSA) nangrimenba dingtang dingtang program-ko ong·atangaha aro ia manianiko Budbar salo dingtangmancha Gokulgre Multi Facility Centre-o program-ko ong·atenba matchotataha.
Ia program-ko District Social Welfare Office sokachakaha aro ia program-o Meghalaya State Rural Livelihood Society (MSRLS), Mendal Sports & Youth Club, dingtang dingtang self help group (SHG)-rang, Village Organisation (VO)-rang aro dingtang dingtang skulni chatro chatrirangba bak ra·angtokaha.
Ia program-ko ong·atanio, Bajengdoba C&RD Block-ni BDO Liam TG Momin, mongsonggipa sokgipa ong·e jinmana aganprakangengon, pekatgipa sam jakkalani aro badingsrukaniko bon·atna warachakanio pilakkon bakrime kam ka·china didiangaha.
Iana skang, North Garo Hills a·jani Senior Medical & Health Officer Dr BD Shira-ba jinmana aganprakangengon, pekatgipa samrangko jakkalanichi mande mai namgijanirangko ra·bana man·achim, uarangni bidingo agan-talatanirangko on·angaha.
Ia program-ko ong·atanio, India a·songko aro mongsongbate North Garo Hills a·jako pekatgipa samrangoni jakgitel ong·atna gita jinma ku·mikchetanikoba dakangaha aro ia ku·mikchetaniko North Garo Hills a·jani DSWO Norimchi Sangma dilangaha.
Tura-ni Little Flower School-oba ia International Day Against Drug Abuse & Illicit Trafficking-ko maniani bak gita dingtang dingtang program-rangko ong·atangaha.
Ia program-ko Tura-ni Najing Bazar-o ong·atangaha aro program-o chatro chatrirang, ma·a paarang, skigiparang aro samba jolrango songdongenggipa manderangba bak ra·angtokaha.
Ia salko manianio skulo poraienggipa chatro chatrirang, dingtangmancha ‘drugs’ ba pekatgipa samrangko jakkalanichi manderangna mai namgijanirangko ra·bana man·achim, uarangni bidingo dakmesokangaha.
Ia salko manianio Little Flower School-ni Principal Bandhana Jogi, jinmana aganprakatengon, ia program-ko chu·sokgipa ong·atna man·ahani gimin chatro chatrirangko, skigiparangko aro skulo bak ong·enggipa sakantikon mittelpilangaha.
“Pekatgipa samrangko jakkalni bidingo mikrakataniko on·na gita an·ching chatro chatrirang da·alo nambee dakmesokangaha aro uamangni dakmesokanian pekatgipa samrangoni chel·e dongna aro an·seng baljoke dongna gita an·ching sakantikon didiani ong·gen,” ine Jogi aganaha.
Ia International Day Against Drug Abuse & Illicit Trafficking-ko nambee maniangahani gimin Little Flower School-ni Honarary Director Dr Gino A Sangma-ba an·tangni kusi ong·aniko parakataha.
Apsan daken, ia International Day Against Drug Abuse & Illicit Trafficking-ko Central Agricultural University (Imphal)-ni ning·o Tura-o donggipa College of Community Science (CCS)-oba maniangaha aro ia salko maniani bak gita Sangsanggre-ni college student-rangna slogan sesusaaniko ong·atangaha.
Ia program-ko Tura CCS-ni ning·o donggipa Human Development & Family Studies Department, Tura Civil Hospital-ni Psychiatry Department baksa nangrime ong·ataha aro ia program-o Tura CCS-ni Dean Dr Jyoti Vastrad, mongsonggipa sokgipa ong·e bak ra·angaha.