TURA: Fifteenth Finance Commission-ni chamatgipa tangka paisarangoni mitamko Municipality-rang, Garo Hills Autonomous District Council (GHADC)-na ma·siatgija jakkalaha ine Tura-ni MDC Bernard N Marak matnangatenba, ian Commission-ni dongimin niamrangko pe·ani gita ong·aha ine parakataha.
Iani bidingo a·dokni Deputy Chief Minister aro District Council Affairs Minister Prestone Tynsong-na badi ka·e sedoatengon, ia bilsini February 2 tariko aro May-ni 8 tariko, Fifteenth Finance Commission-ni ning·o chamatgipa instalment-rangni bidingo Fifteenth Finance Commission Coordination Committee-ni tik ka·giminko Municipality-rang pe·aha maina uamang GHADC-na ma·siatgija proposal-rangko submit ka·aha aro mitam tangka paisarangko jakkalaha ine Marak matnangataha.
“Tangka paisarangko jakkalani bidingo Coordination Committee adita niamrangko donenba, Urban Affairs-ni director-na sedoatahachim indiba iani bidingo GHADC-o sing·sandion Municipality-ni jakkalgipa tangka paisarangni bidingo darangba ma·sitokjaha. RTI ka·e am·sandion, GHADC-na ma·siatgija kamrangko ka·aha ine ma·sina man·aha aro iani bidingo GHADC-na u·iaton, GHADC-ni CEM, June-ni 27 tarik Bristibar salo ong·atanggipa tom·aniona, Fifteenth Finance Commission-ni ning·o tangka paisarangko jakkalenggipa pilak Municipality-ni CEO-rangkoba okamatahachim indiba uamangoni darangba ia tom·aniona sokbajaha. Ian GHADC-ni CEM-ko chonnikani gita ong·aha,” ine Tura MDC parakataha.
Marak-ni parakatani gitade, Urban Local Body-rang, Autonomous District Council (ADC)-ni official-rang baksa CEM/Deputy CEM-ni gadango tom·aniko ong·atgen ine re·anggipa May jani 8 tarikon tik ka·aha aro uandaken GHADC-ni CEM, niamo pangchake project aro proposal-rangni bidingo chanchirimna gita Bristibar salo ia tom·aniko ong·atangahachim indiba ia tom·anio CEO-rang bak ra·eskajaha.
“Kamrangko Urban department aro jillani MDC-rangsa tik ka·gen ine coordination committee tik ka·ahachim indiba Urban department-ni biapo Fifteenth Finance Commission-ko implement ka·enggipa Municipality-rang, ia niamrangko ja·rikjaha. MDC aro GHADC baksa agangrikchenggija Municipality, proposal-rangko watataha. Municipality Board-rangni tarigipa proposal-rang bang·batan Municipal-ni ning·o ga·akgiparang ong·jani gimin jillani manderangde ia project-rangni namgnirangko man·tokjawaha,” ine Tura MDC parakataha.