TURA: BSNL-ni Fibre to the Home (FTTH) service-ko Sukrobar salo, Telecom Infrastructure Partner (TIP) M/s Prime Alternatives-ni gita Garobadha-o a·bachengataha.
Ia FTTH service-ko Rangsakona-ni MLA Subir Marak, Garobadha-ni Nirupama Memorial Secondary School-o a·bachengate on·angaha aro ia tom·anio, Garo Hills BSNL-ni Divisional Engineer Santosh Chaukaskar aro gipin official-rangba dongpae bak ra·angtokaha.
Garobadha-o ia FTTH service-ko a·bachengate on·anganio Rangsakona-ni MLA, jinmana aganprakangengon, internet-ko ta·rakbate on·anichi maikai lekka porako aro mandeni janggi tanganiko tang·doatna man·a, uarangni gimin agan-talatanirangko on·angaha. Ia FTTH service-ko an·tangtangni janggi tanganiko tang·doatna gita jakkalchinaba Marak, jolo songdongenggipa manderangko didiangaha.
Ia tom·anio Rerapara Block-ni BDO Armand Momin-ba dongpae jinmana aganprakengon, noktango FTTH service-ko jakkalanichi namgnirangko man·enga ine Garobadha jolo songdongenggipa manderangkoba iani namgniko ra·china didiangaha.
