Gambegre by-election-o susaani bidingo chanchikuja
SHILLONG: Khasi Hills Autonomous District Council (KHADC) aro Jaintia Hills Autonomous District Council (JHADC)-ni election-ko ta·rake ong·atna man·na gita delimitation ba constituency sualpiltaiani kamrangko ta·rake matchotatchina United Democratic Party (UDP) dabiangaha.
UDP-ni general secretary Jemino Mawthoh-ni kobor ra·timgiparangna parakatani gitade, KHADC aro JHADC election-o susana gita UDP tarimanahani gimin ia district council damgnini election-ko ta·rake ong·atchina uamang nangnikenga.
KHADC aro JHADC-ni UDP membor-rangba ta·raken election-ko ong·atchina nangniktokenga ine janapatengon, ia district council damgnini manderang, an·tangtangni dilgiparangko somoi gita seokna election-ko ta·raken ong·atchina UDP-ni dilgiparang nangnikenga ine Mawthoh aganaha.
Delimitation bai a district council damgnini constituency-rangko sualpiltaianio kamrangko nirokenggipa committee, ia kamko ta·raken matchotatgen ineba ua an·tangni ka·dongchakenganiko parakataha.
KHADC aro JHADC-ni election-ko ia bilsini February jaon ong·atani ong·ahachim indiba constituency-rangko gital dake sualpiltaiengani gimin district council damgnikon jadokna ra·dodapatahachim.
Ia district council damgnini delimitation committee-ko re·anggipa bilsion a·dokni Governor ra·chakmanaha aro uandaken ia committee, da·o kamrangko ka·engahachim.
Gambegre Assembly constituency-ni by-election-ni bidingo sing·anina aganchakaniko on·angskaengon, da·o dipet ia by-election-o susaani bidingo UDP name tik ka·kujaenga ine UDP-ni general secretary parakataha.
Gambegre by-election-o susaani bidingo da·o dipet uamang, Garo Hills-o UDP-ko dilenggipa manderangni chanchianirangna sengengkua aro uamangni u·iatanio pangchakesa ja·kurangko de·anggen ineba Mawthoh aganaha.
Lok Sabha election-o Congress dolni candidate Saleng A Sangma, NPP-ni candidate aro Tura-ni gitcham MP Agatha K Sangma-ko lak 1.55-na batgipa vote-rangchi chee gital MP-na seokako man·ahachim aro Saleng-ni MLA ong·aoniko watangani ja·man da·o Gambegre Assembly constituency-na gital MLA-ko seoktaina nangengahachim.