SHILLONG: Ma·mong aro a·dok sorkarirang baksa agangrikaniko ra·pilani ja·man da·o Hynniewtrep National Liberation Council (HNLC) bobil dol, sorkari baksa tom·tomanina agangrikani bidingo chanchipiltainaba gnang.
HNLC bobil dolni gitcham case-rangko kema ka·ani bidingo chanchipiltaina gita sorkarini parakatani ja·man HNLC bobil dolni dilgiparang, sorkari baksa agangrikani bidingo chanchipiltainaba gnang.
HNLC bobil dolni ku·baltitimgipa Sadon Blah-ni kobor ra·timgiparangna parakatani gitade, sorkari baksa tom·tomanina agangrikaniko a·bachengpiltaichina ua HNLC bobil dolni dilgiparangko didiataha.
“Sonibar pringo anga HNLC bobil dolni dilgiparang baksa agangrikataha aro HNLC-ni bangki case-rangko sorkari kema ka·ani bidingo chanchipiltaina u·iatahani gimin uamang sorkari baksa agangriktaina chanchipiltainaba gnang,” ine Blah aganaha.
Sorkari baksa tom·tomanina agangrikaniko HNLC bobil dol, chu·gimik ra·pilsrangade ong·kuja ine janapatengon, “HNLC bobil dolni dingtang dingtang dabianirang, jekai bangki dongkuenggipa case-rangko kema watani, bobil dolni kosako champengatani, case-rangko ra·pilani aro uandakgipa dabianirang dongani gimin HNLC bobil dolni gitaba sorkari baksa agangrikaniko chu·gimik chipsrangade ong·kuja. Sorkari ia dabianirangko knachakna kusi ong·genchimode uamangba agangrikaniona re·bapilna kusi ong·aigen,” ine Blah parakataha.
HNLC-ni case-rangko kema ka·ani bidingo a·dok sorkari, ma·mong sorkari baksa agangrikkuenga aro iani bidingo HNLC bobil dolnaba u·iatenga ine adita salrangna skangsan, a·dokni Chief Minister Conrad K Sangma parakatahachim.
HNLC-ni chonchongipa case-rangkode sorkari kema ka·na man·aigen indiba ka·namgijagipa case-rangni giminde sorkari name nipiltaina nanggen ineba ua aganahachim.
HNLC-ni case-rangko kema watchina dabianirang baksana mingbonga dabianirangko sorkari chu·sokatna man·jaenga ine matnangenba, ma·mong aro a·dok sorkarirang baksa tom·tomanina agangrikaniko HNLC bobil dol ra·pilahachim ine nikna man·a.