SHILLONG: Matchotkugijagipa Jal Jeevan Mission (JJM)-ni kamrangko matchotaha ine a·kangengani gimin a·dok sorkarini kosako kachario badi ka·na gita Robibar salo, a·dokni BJP mikrakataniko on·angaha.
Dingtang dingtang songrangona re·ange nianio bang·en matchotgija dongenggipa JJM-ni kamrangko nikna man·aha ine janapatengon, “Matchotgimin JJM-ni kamrangna manderang chu·onga gita chirangko man·e chu·ongnikaniko man·na nangahachim. Matchotgijagipa kamrangko matchotaha ine sign board-rango seanina contractor, engineer aro JJM-ni kamo jak donggipa pilakni kosakon nanga gita ja·kurangko de·anggen,” ine Tura-ni MDC aro BJP-ni state vice president Bernard N Marak parakataha.
JJM-ni ning·o nokdang ge·antinan ringani chirangko on·na miksongesa ma·mong sorkari ia kamko ra·gatahani gimin manderang chirangko man·jagenchim ong·ode, matchotgija kamrangko BJP nie dongjawa aro dos donggipa manderangni kosako ja·kurangko de·gen ineba ua mikrakataniko on·angaha.
JJM-ni kamrangni bidingo report-ko ma·mong sorkarina on·atgen aro chubata gadangchi inquiry-ko dakchina didigen ineba Marak parakataha.
“Je songrangon JJM-ni kamrang matchotgija, sign board-rango matchotaha ine segenchim, uandakgipa songni manderang, sign board-ni noksarang baksa Arigri.com website-o badi ka·na man·gen aro chinga uandakgipa manderangni kosako ja·kurangko de·anggen,” ine Tura MDC parakataha.
July jani gnigipa anti dipet Khasi aro Jaintia Hills a·jarangona ia arigri.com website-ko a·bachengatgnok ineba Marak parakataha.
Meghalaya a·dokni bang·a songrangon JJM-ni kamrangko matchotja ba kamrangko name ka·ja ine badi ka·anirangko knana man·engachim.
Iandake JJM-ni kamrangko name ka·ja ba matchotja ine dingtang dingtang songni manderang badi ka·tokengoba JJM-ni kamrangko ka·anio maming dongnuani aro ong·gija dakanirang dongja ine a·dok sorkari a·kangskaengachim.