TURA: Tura-ni PA Sangma Stadium-o pakma be·grugipani bidingo RTI ka·anina Deputy Commissioner-ni office aganchakaniko on·na jechakaha ine Robibar salo, Tura-ni MDC aro BJP-ni state vice president Bernard N Marak parakataha.
Marak-ni parakatani gitade, adita salrangna skang PA Sangma Stadium-ko kadule donenggipa temporary wall be·gruahani gimin ua talbate ma·sie ra·na RTI ka·ahachim indiba uni RTI ka·anina DC office-ni public information officer, ‘sing·anirang rongtalja’ inesa aganchakaniko on·skaaha.
“District-ko dilenggiparangan RTI ka·anirangna aganchakaniko on·jaenga ong·ode chinga gipin department-rangonikode maiko ka·dongna man·srangkugen. Angni RTI ka·anio, PA Sangma Stadium-ko rikanio pilak project-ni detailed project report (DPR)-rang, ma·mongoni badita tangka paisarangko chamataha aro da·alona kingking badita koros ong·aha, project mingantini gadang aro matchotani somoi, iana skang pakma be·grugipani bidingo maiko ja·ku de·aha, be·grugipa pakmani DPR aro ia pakmako rikna sawa sanction ka·a, iarangko tale ma·sie ra·na gitasa sing·sandiahachim. Indiba DC office-ni PIO, ‘sing·anirang rongtalja’ inesan aganchakaniko on·aiaha,” ine Tura MDC parakataha.
Ia Stadium-ko rikanio parakani gri ong·enga aro District Administration-ni RTI-na aganchakaniko on·gijaniara RTI Act-ko pe·ani ong·aha ineba Marak parakataha.
PA Sangma Stadium-ni bidingo ua ma·mong sorkariona ra·anggen aro iani bidingo ua aini gita ja·ku de·aniko am·gen ineba Marak parakataha.
Stadium pakma be·grugipani bidingo RTI ka·anina aganchakja ine Bernard matnanga
Date:
Share post:
