SHILLONG: Sorkarini dakchake on·enggipa pilak skul aro college-rangna skigipako ra·anio District roster system-ko ja·rikna gita Mongolbar sal dipet a·bachengataha ine a·dokni Education Minister Rakkam A Sangma parakatenba, Meghalaya a·doko ja·rikbaenggipa reservation policy-ko bakan niamni nikanio nipilanggnok ine an·tangni suk ong·gijaniko parakataha.
District roster system-ko ra·gatani bidingo kobor ra·timgiparangna talate on·angengon, ia roster system-ko sorkarini dakchake on·enggipa pilak institute-rangon, sorkarini sanction ka·gimin post-rangna ja·rikanggnok ine Education Minister parakataha.
Sangma-ni aganani gitade, ia district roster system, sorkarini bang·a bang·gija dakchake on·enggipa skul ba college-rangnade nangchakeani dongskajawa.
Indake ong·engon, higher education-o bangbang ong·e dongenggipa kamrang ge 800-na baten donga aro ia bangbang ong·e dongenggipa kamrangoni ge 400-na baten da·o bakan gapatna gita tik ka·manaha ine Education Minister parakataha.
Ia bangbang ong·e dongenggipa kamrangko gapatanio a·bachengoni ja·rikbaenggipa 80 percent reservation-kon ja·rikangkugen ine janapatengon, roster system-de formula gitasan ong·aia ine Sangma talataniko on·angaha.
Education Minister-ni talatani gitade, a·dokni Reservation Policy-o Garorangna 40 percent aro Khasi-Jaintiarangna 40 percent-ko chamani dongani gimin ia apsan niamkon ja·rikna gitasa District roster system-ko pilak department-rangon ra·gatengaha.
