TURA: South Garo Hills a·jani headquarter Baghmara jillao bang·a ramarangan namsrangjahani a·sel re·ruraanirango neng·nikanirangko chagrongna nangtokenga ine A·chik Conscious Holistically Integrated Krima (ACHIK) Southern Zone parakatenba, ia ramarangko ta·raken taripile on·china South Garo Hills a·jani Deputy Commissioner-na sedoataha.
ACHIK Southern Zone-ni parakatani gitade, Baghmara jillani bang·bata ramarangan, mongsongbate Baghmara Block office-ona dakanggipa rama, A·sim Chiring-oni Do·pakrang-ona dakanggipa rama, Captain Williamson Memorial Govt College-ona dakanggipa rama aro Baghmara PHE junction-oni Bolsalgre-ona dakanggipa ramarangko ru·uta bilsirangonin taripile on·anirang dongjani a·sel da·o ia ramarang a·kolrara dakan baksana ramarang apchone, re·ruraenggipa manderangna namen neng·nikanirang ong·enga.
“Ia ramarang da·o gita wachini somoirangode manderangna, mongsongbate kosako janapgimin office-rango kam ka·enggiparangna namen neng·nikanirangko on·enga. Uni gimin ia ramarangko ta·raken taripile on·china chinga mol·molenga,” ine ACHIK-SZ-ni general secretary Wilban N Sangma, South Garo Hills a·jani Deputy Commissioner-na sedoatgipa chittio janapataha.