Gambegre Block-ni song damgnina CM transformer-ko on·ata

TURA: Gambegre Assembly constituency-ni by-election-ko da·o adita jarangni gisepon ong·atna siengahaon, Gambegre constituency-ni ning·o donggipa Chenggapara aro Bendikgre songrangna, Meghalaya a·dokni Chief Minister Conrad K Sangma, transformer-ko on·gilataha ine National People’s Party (NPP) Gambegre Block-ni organising secretary Bostone M Sangma parakataha.
Koborko on·ani gitade, Chenggapara aro Bendikgre songrango donggipa manderang, jasa batpile bijoli gri ong·e dongna nangtokengachim indiba ia songrango donggipa manderangni neng·nikanirangko kobor man·soani ja·man a·dokni Chief Minister, ia songrangna transformer-ko on·gilataha.
Ia transformer-ko NPP Gambegre Block-ni president Meckenson Ch Marak aro Chenggapara songni manderang, re·ange ra·dilbaaha ineba Sangma parakataha.
Iani bidingo Chenggapara aro Bendikgre songni manderang, Chief Minister-ko kusi ong·e mittelpilataha ine janapatengon, Gambegre constituency-ni ning·o donggipa badiaba songrango iandakgipa neng·nikanirangko chagrongna nangenga ong·ode party-ni dilgiparango u·iatna man·gen ine NPP Gambegre Block-ni organising secretary parakataha.