TURA: Tribal Artisans Empanelment Mela-ni gittamgipa bakko Sombar attamo, New Delhi-ni Tribal Cooperative Department Federation of India Ltd (TRIFED), Guwahati Regional Office, IIE Guwahati, West Garo Hills District Administration, Meghalaya Basin Management Agency (MBMA), Prime Start-Up Hub Tura aro Meghalaya State Rural Livelihood Mission nangrime, Tura-ni Dakkopgre-o donggipa SMELC-o ong·atangaha.
Salgro salaram a·dokrango jakni dingtang dingtang kamrangko ka·e cha·enggipa manderangko dakchakna gita ia Mela-ko ong·ataha aro India sorkarini ning·o donggipa Tribal Affairs Ministry, dingtangmancha ‘Marketing and Logistics Development for Promoting Tribal Products from the North-Eastern Region’-koba a·bachengataha.
Ia Mela-ko ong·atanio, West Garo Hills a·jani Deputy Commissioner Jagdish Chelani, mongsonggipa sokgipa ong·e bakko ra·angaha aro unbaksana Assistant Commissioner Chetaniya Awasthi-ba ia program-o dongpae bak ra·angaha.
Ia mela-ko ong·atanio, West Garo Hills a·ja gimikoni sak 100-na baten bading chiwale cha·enggipa manderang, jemangan ba·ra sika koani, wata chengani, cha·ani tariani aro uandakgipa kamrangko ka·e cha·engachim, uamang bakko ra·angenba, an·tangtangni tarigimin bosturangko mesokangaha.
Ia Mela-ko ong·atanio West Garo Hills NABARD-ni DDM Kittmiller Sangma, MBMA-ni DPM V Valentine Hembrom, MBMA-ni Senior Manager Sujib Mishra, TRIFED Guwahati-ni Senior Program Exucutive Asif Ekbal Hussain aro gipinrangba dongpae bak ra·angtokaha.