SHILLONG: Gambegre Assembly-ni by-election-na National People’s Party (NPP)-ni biming minge dongipa sakchet membor-rangoni saksako seokaha indiba da·o dipet candidate-ni bimingko NPP-ni dilgiparang parakna gita jechakaha.
NPP-ni working president Marcuise N Marak-ni parakatani gitade, Gambegre by-election-o susaatna gita NPP-ni dilgiparang baditaba chang chanchirimenba da·o ia candidate-ko biming mingaha.
Gambegre by-election-na NPP-ni candidate-ko parakatna skang NPP-ni dilgiparang changsa asonge chanchirimangtaigen ineba Marak parakataha.
Marak-ni aganani gitade, ia by-election-o susaatna gita gimik sakchet membor-rangni bimingko minge donangchengahachim indiba uamangoni sakbride susaaniko watgalani ja·man membor sakbrioni saksako NPP-ni dilgiparang da·o biming mingaha.
Indake ong·engon, Gambegre by-election-o NPP-ni candidate ong·e susana sienggipa mandeara, Chief Minister Conrad K Sangma-ni jikgipa Mehtab Chandee ong·a ine kobor on·timgiparang parakatskaaha.
Chief Minister-ni jikgipako Gambegre by-election-na NPP-ni candidate ine parakatna skang, dingtang dingtang nanga kamrangko ka·chengenga ineba kobor on·timgiparang parakataha.
Adita salrangna skang ong·atanggipa Lok Sabha election-o Congress dolni candidate Saleng A Sangma, NPP-ni candidate aro Tura-ni gitcham MP Agatha K Sangma-ko lak 1.55-na batgipa vote-rangchi chee gital MP-na seokako man·ahachim aro Saleng-ni MLA ong·aoniko watangani ja·man da·o Gambegre Assembly constituency-na gital MLA-ko seoktaina nangengachim.
Da·o dipet Gambegre by-election-ni tarikko Election Commission parakatkujaengoba, ia by-election-ko jadokni gisepon ong·atna nangengachim.